வேதாந்த வைபவம்

திருக்கோவில் உழவாரப் பணி மன்றத்தின் அழைப்பிதழ்.

2012-02-03T19:49:00.000+05:30

திருச்சிற்றம்பலம்

சைவா போற்றி.

தலைவா போற்றி.

இனிய புத்தாண்டு மற்றும் பொங்கல் நல்வாழ்த்துக்கள்.

நமது திருக்கோவில் உழவாரப் பணி மன்றத்தின் பிப்ரவரி மாத திருக்கோவில் உழவாரப் பணி 05.02.2012 ஞாயிறு காலை காட்டூர் கிராமம் (வழி:திருப்போரூர்) அருள்மிகு தையல்நாயகி உடனுறை வைத்தியலிங்கேஸ்வரர் திருக்கோயிலில் நிகழ திருவருள் கூட்டியுள்ளது.

இதனைக் கண்ணுறும் அன்பர்கள் சுற்றத்துடனும்,நண்பர்களுடன் 05-02-2012 அன்று காலை ஏழு மணிக்கே வந்திருந்து உழவாரப் பணியினை சிறப்பாக நடத்தி தருமாறு வேண்டுகிறோம்.

திருக்கோவிலின் தீப எண்ணெய்க்கு பெருமளவில் அடியார்களின் உதவி தேவைப்படுகிறது.

மதிய நேரத்தில் தொண்டர்களுக்கு அமுது செய்விக்கப்படும்.

காட்டூர் கிராமம் திருக்கோவிலுக்கு செல்லும் வழி:

திருப்போரூருக்கு ஒரு கிலோ மீட்டருக்கு முன்பாக கண்ணகப்பட்டு பஸ் ஸ்டாப்பில் இருந்து வலது புறம் நான்கு கி.மீ தொலைவில் காட்டூர் கிராமம் உள்ளது. தாம்பரத்தில் இருந்து கூடுவாஞ்சேரி, நெல்லிக்குப்பம் வழியாகவும் பஸ் மூலம் காட்டூர் கிராமத்துக்கு வரலாம். திருப்போரூரில் இருந்து காட்டூர் கிராமத்துக்கு நிறைய போக்குவரத்து வசதி உள்ளது. கண்ணகப்பட்டு பஸ் நிறுத்தத்தில் இருந்து காட்டூர் கிராமம் வர ஷேர் ஆட்டோ வசதி உண்டு.

பஸ் ரூட்:

T60 - தாம்பரம் - காட்டூர் (வழி கூடுவாஞ்சேரி)

55N - தாம்பரம் - திருப்போரூர் (வழி கூடுவாஞ்சேரி)

555N - தாம்பரம் - திருப்போரூர் (வழி கூடுவாஞ்சேரி)

555M - தாம்பரம்-திருப்போரூர் (வழி மாம்பாக்கம்)

55V Cut - தாம்பரம்-காட்டூர் (வழி மாம்பாக்கம்)

இறங்குமிடம்: காட்டூர் வைத்தியலிங்கேஸ்வரர் சிவன் கோவில்.

அமைப்பாளர் சிவ. நா. ஆடலரசன் அவர்களை Cell No.9445121080 இல் தொடர்பு கொண்டு மேலதிக விவரங்களைப் பெறலாம்.

சிவத் தொண்டாற்றி சிவனருள் பெறுக.

மேன்மை கொள் சைவ நீதி விளங்குக உலகமெல்லாம்.

பொங்கும் மங்கலம் எங்கணும் தங்குக.

2012-01-14T23:25:00.001+05:30

பொங்கல் திருநாள் வாழ்த்துக்கள்.

எண்ணம் யாவிலும் நெஞ்சினித்திட,

நவில் தோறும் பொழுதினில் நாவினித்திட,

வினைகளின் பயனாய் இனிமை விளைந்திட,

எல்லோர் வாழ்விலும்

இனிவரும் நாளெல்லாம்,

நனி வளம் பெருகிட,

பொங்கும் மங்கலம் என்றும் தங்கிட,

என்னாணை அம்பலத்தான்

இன்னருள் வேண்டி யான்

வணங்குவன் நிதமும்.

வாழி நலம் சூழ...

' அன்பே சிவம்' அஷ்வின்ஜி.

பிரபஞ்சத் துகளில் 'நான்' யார்?

இனிய புத்தாண்டு வாழ்த்துக்கள் - இனிக்கட்டும் 2012

2011-12-31T17:34:00.000+05:30

இனிக்கட்டும் புதிய ஆண்டு.

எல்லா நலமும், எல்லா வளமும் பெற்று சிறந்து வாழ, இறையன்பர்களுக்கு எனது இதயம் நிறை புத்தாண்டு வாழ்த்துக்களை தெரிவித்துக் கொள்கிறேன்.

திருக்கோவில் உழவாரப் பணி மன்றத்தின் அழைப்பிதழ்.

2011-12-24T13:47:00.002+05:30

திருச்சிற்றம்பலம்

சைவா போற்றி.

தலைவா போற்றி.

இனிய புத்தாண்டு மற்றும் பொங்கல் நல்வாழ்த்துக்கள்.

நமது திருக்கோவில் உழவாரப் பணி மன்றத்தின் ஜனவரி மாத திருக்கோவில் உழவாரப் பணி 01.01.2012 ஞாயிறு காலை திருவாலங்காடு அருள்மிகு வண்டார்குழலி உடனுறை வடாரண்யேஸ்வரர் திருக்கோயிலில் நிகழ திருவருள் கூட்டியுள்ளது.

இதனைக் கண்ணுறும் அன்பர்கள் சுற்றத்துடனும், நண்பர்களுடன் 31.12.2011 (சனிக்கிழமை) காலை எட்டு மணிக்கே வந்திருந்து உழவாரப் பணியினை சிறப்பாக நடத்தி தருமாறு வேண்டுகிறோம்.

சனி, ஞாயிறு இரண்டு நாட்களும் உழவாரப்பணி நடைபெற உள்ளது. திருவாலங்காடு திருமுறைப் பாடல் பெற்ற தலம். காரைக்கால் அம்மையார் பாடிய தலம். ஐந்து சபைகளில் ஒன்றான இரத்தின சபை தலம்.

இரண்டு நாட்களும் தங்கும் வசதியும், உணவு வசதியும் ஏற்பாடு செய்யப்பட்டுள்ளது.

மதிய நேரத்தில் தொண்டர்களுக்கு அமுது செய்விக்கப்படும்.

திருவாலங்காடு திருக்கோவிலுக்கு செல்லும் வழி:

திருவள்ளூருக்கும், அரக்கோணத்துக்கும் இடையில் திருவாலங்காடு இரயில நிலையம் உள்ளது. அரசு பேருந்து வசதி திருவள்ளூரில் இருந்து உள்ளது. சென்னை சென்டிரலில் இருந்து அரக்கோணம், திருத்தணி செல்லும் மின்தொடர் வண்டிகள் அனைத்தும் திருவாலங்காடு இரயில நிலையத்தில் நிற்கும். இரயில நிலையத்தில் இருந்து திருக்கோயிலுக்கு செல்ல ஷேர் ஆட்டோ வசதி உள்ளது. திருவள்ளூர் பஸ் நிலைய எதிரில் உள்ள நீதிமன்ற வாசலில் இருந்து சனிக்கிழமை, ஞாயிற்றுகிழமை இரண்டு நாட்களிலும் காலை ஏழு மணிக்கு மன்றத்தின் மூலம் இலவசமாக திருவாலங்காடு வரை திருமுருகன் கல்லூரி பஸ் ஏற்பாடு செய்யப்பட்டுள்ளது.

சிவத் தொண்டாற்றி சிவனருள் பெறுக.

மேன்மை கொள் சைவ நீதி விளங்குக உலகமெல்லாம்.

பழனி - கொடைக்கானல் யோகா-உடல் மன நலக்கலை முகாம் அழைப்பிதழ்.

2011-12-19T08:23:00.000+05:30

உ

மெய்த்தவம்.

மாநில அளவிலான உடல் நலக் கலை யோகா, தவம், இயற்கையோடு இணைந்த வாழ்வு முகாம் அழைப்பிதழ்.

நாள்: 26-12-2011 to 30-12-2011
(திங்கள் முதல் வெள்ளி வரை)

முகாமின் முக்கிய நிகழ்வுகள்

ஆத்ம விசாரத்தின் மூலம் உடல் உபாதைகளில் இருந்தும், மனச் சோர்விலிருந்தும் விடுதலை பெற்று தெளிவு பெறச் செய்தல்.

ஆசனங்கள், பிராணாயாம, தியானம் மற்றும் இயற்கை நலவாழ்வியல் முறைகள் மூலம் நோயற்ற வாழ்வு வாழ பயிற்சிகள்.

மருத்துவ விளக்கங்கள் மூலம் உண்மை நிலையை அறிதல்.

விளக்க உரை நிகழ்த்துவோர்.

யோக உரை: யோகி நீ.ராமலிங்கம், செயலர், தமிழ்நாடு யோகாசனச் சங்கம், மதுரை.

மெய்த்தவம்: மெய்த்தவ. திருச்செந்தில் அடிகள், சுவாமி தயானந்த குருகுலம்

இயற்கை விஞ்ஞானம்: கோ.சித்தர், இயற்கை விஞ்ஞானி, தஞ்சாவூர்.

இயற்கை நல உணவு: இயற்கை பிரியன் Er. இரத்தின சக்திவேல், சென்னை.

பிராண தத்துவம்: தவத்திரு நா. சின்னச்சாமி,இயற்கையாளர், தமிழ்நாடு இரும்பு வணிகம், பழனி.

மருத்துவ விளக்கம் அளிப்போர்:

Dr.N.C.பேச்சிமுத்து, K.G.மருத்துவ மனை, பழனி.Dr.N.மணிமாறன், குழந்தை நல மருத்துவர், பழனி.Dr.B.ராஜேந்திரன், M.Acu, அக்குப்பங்ச்சர், கம்பம்.Dr. M.யோகலட்சுமி, அரசு மருத்துவர், பழனி.

நலம் தரும் யோகம்: A.T.ஹரிஹரன், M.Sc(Yoga), தணிக்கையாளர், இந்திய ரயில்வே, சென்னை.

யோக வாழ்வு:

யோகாசாரியா R.முருகன், சுவாமி தயானந்தா குருகுலம்
S.முருகேசன், பழனி சேவா சங்கம்.

பயிலரங்கம்: தினமும் காலை ஆறு மணி முதல் பத்து மணி வரை மற்றும் மாலை நான்கு மணி முதல் ஏழு மணி வரை. நடை பெறும் இடம்: ஐஸ்வர்யா பர்ம், இரும்பு வணிகத் தோட்டம், அண்ணா நகர் பஸ் ஸ்டாப், கொடைக்கானல் சாலை, பழனி.

கருத்தரங்கம்: தினமும் காலை பத்து மணி முதல் மதியம் ஒரு மணி வரை. நடைபெறும் இடம்; சாய் சதன், சன்முகபுரம், உழவர் சந்தை அருகில், பழனி.

முகாம் ஒருங்கிணைப்பாளர்கள்:

குருகுலம் மாணவர்கள், சுவாமி தயானந்தா குருகுலம்,

7/176, லட்சுமிபுரம், பழனி.

வலைத்தளம்: www.yogapoornavidya.com

தொடர்புக்கு: 9894685500 and 9444171339

முகாமில் தங்கி பயிற்சி பெற வருவோர் கீழ்க்கண்ட பொருட்களை தவறாமல் முகாமுக்கு வரும்போது எடுத்து வரவும்.

உறங்கும் போது கீழே விரித்துக்கொள்ளவும், போர்த்திக் கொள்ளவும் தேவையான பெட்ஷீட் மற்றும் கம்பளி போர்வை.
குளிரிலிருந்து தற்காத்துக் கொள்ளத் தேவையான உல்லன்/கம்பளி குல்லா, சால்வை, மஃப்ளர் மற்றும் ஸ்வெட்டர், காதுகளை குளிரில் இருந்து பாதுகாத்துக் கொள்ளும் கவசம், etc..
யோகா பயிற்சி செய்ய உதவும் வகையிலான உடைகள். (Track suits, Tshirts, bermuda and Sports outfits)
நோட்டுப் புத்தகம் மற்றும் பேனா (குறிப்பெடுக்க)
டார்ச் லைட் (மின்சாரம் இல்லாத போது உதவும்)
ஸ்பூன், ஒரு சிறிய கத்தி (பழம் நறுக்க உதவும்)
நகைகள் போன்ற ஆடம்பரமான மற்றும் விலை உயர்ந்த பொருட்கள் எதையும் கொண்டு வரவேண்டாம்.
மூன்று நான்கு மெல்லிதான டவல்கள் (towels) கொண்டு வரவும்.
உங்களுடன் கொண்டு வர வேண்டிய மிக மிக முக்கியமான ஒன்று: - சூழ் நிலைக்கேற்றமாதிரி அனுசரித்துச் செல்லும் மனப்பாங்கு.

நன்றி.

நேரில் சந்திப்போம்.

வாழி நலம் சூழ..

ஈசன் திருக்கோவில் உழவாரப் பணியில் இணைய வாருங்கள்.

2011-12-01T14:45:00.000+05:30

திருச்சிற்றம்பலம்

ஞானவாள் ஏந்தும்ஐயர் நாதப் பறையறைமின்
மானமா ஏறும்ஐயர் பதிவெண் குடைகவிமின்
ஆனநீற் றுக்கவசம் அடையப் புகுமின்கள்
வானவூர் கொள்வோம்நாம் மாயப்படை வாராமே. 615

தொண்டர்காள் தூசிசெல்லீர் பக்தர்காள் சூழப்போகீர்
ஒண்திறல் யோகிகளே பேரணி உந்தீர்கள்
திண்திறல் சித்தர்களே கடைக்கூழை செல்மின்கள்
அண்டர்நா டாள்வோம் நாம் அல்லற்படை வாராமே. 616

(மாணிக்கவாசக சுவாமிகள் அருளிய திருப்படை எழுச்சி)

திருச்சிற்றம்பலம்

திருக்கோவில் உழவாரப் பணி மன்றம் சார்பில் வருகிற 04-12-2011 (ஞாயிற்றுக் கிழமை) அன்று காலை ஏழு மணி முதல் மாலை ஆறு மணி வரை பழைய பெருங்களத்தூர் அகிலாண்டேஸ்வரி உடனுறை அகத்தீஸ்வரர் திருக்கோவிலில் உழவாரப் பணி நிகழ திருவருள் கூட்டி உள்ளது.

இதனைக் கண்ணுறும் அன்பர்கள் நண்பர்களுடன் வந்திருந்து உழவாரப் பணியினை சிறப்பாக நடத்தி தருமாறு வேண்டுகிறோம்.

மதிய நேரத்தில் தொண்டர்களுக்கு அமுது செய்விக்கப்படும்.

திருக்கோவிலுக்கு செல்லும் வழி:

தாம்பரத்தில் இருந்து இத்திருக்கோவில் மூன்று (3) கி.மீ தூரத்தில் உள்ளது. தாம்பரத்தில் இருந்து மண்ணிவாக்கம்-படப்பை செல்லும் பேருந்தில் ஏறி முடிச்சூர் ரோட்டில் உள்ள பத்மாவதி திருமண மண்டபம் (அ) பழைய பெருங்களத்தூர் அம்பேத்கார் சிலை பஸ் நிறுத்தத்தில் இறங்கி பழைய பெருங்களத்தூர் பேரூராட்சி அலுவலகம் செல்லும் பாதையில் நடந்து சென்றால் திருக்கோயிலை அடையலாம்.

சிவத் தொண்டாற்றி சிவனருள் பெறுக.

7. பத்தர் பரசும் பசுபதிநாதம் - நின் திரு யாழில் என் இறைவா...

2011-11-08T22:12:00.001+05:30

ஓம் நமசிவாய.

இந்தச் சேதியை இங்கே பகிர்ந்து கொள்ளலாமா ? வேண்டாமா? என்றெல்லாம் பல முறை யோசித்து விட்டு இதனை இங்கே எழுதுகிறேன்.

நின் திருயாழில் என் இறைவா

பல பண் தரும் நரம்புண்டு.

என்னையும் ஓர் சிறு நரம்பெனவே அதில்

இணைத்திட வேண்டும் இசையரசே.

(தாகூரின் கீதாஞ்சலியில் இருந்து)

கடந்த செப்டம்பர் மாதம் நேபாள யாத்திரையின் போது தாகூரின் மேற்கண்ட கீதாஞ்சலி பாடலை அழகிய குரலில் பாடி, எனக்கும் பாடக் கற்றுத் தந்த சகோதரி திருமதி மாதரசி நேற்று (07-11-2011 அன்று ) சிவனின் திருவடியை அடைந்து விட்டார்.

சகோதரி மாதரசி, கணவர் ராம்ராஜுடன்

பசுபதி நாதர் திருக்கோவில் வாசலில்.

எங்களது யாத்திரை முழுதும் எல்லா நாட்களிலும் ஒவ்வொரு வேளையிலும் சிவபுராணம் பாடியும், எல்லா விதமான பக்திப் பாடல்களையும் பாடி எங்கள் அனைவரையும் பக்தி பரவசத்தில் திளைக்க வைத்த அந்த ஜீவன் சிவனைத் தேடிச் சென்று விட்டது.

சிவபுராணத்தினை பாடிடும் பொழுதெல்லாம் நெக்குருகி, கண்ணீர் பெருக பாடுவார்கள் இந்த அம்மையார். அன்பே சிவமாய் விளங்கி எங்கள் எல்லோரிடமும் பழகிய சகோதரி அன்பே சிவமாக அமர்ந்து விட்டார்கள்.

கடந்த இருபது ஆண்டுகளாக எனக்கு பரிச்சயமான இந்த அன்பு உள்ளம, தனது இரு மகள்களையும், அன்புக்கு ஏங்கும் கணவனையும் தவிக்க விட்டுவிட்டு இறைவனடியை சேர்ந்து விட்டது.

பயணம் முழுதும் சஹயாத்திரிகளிடம் பண்புடனும், தூய அன்புடனும் பழகி வந்த பாசப் பறவை பறந்து சென்று விட்டது.

மரணம் இனிதுதான். ஆனால் பிரிவு கொடிது.

பக்தி மயமாக விளங்கிய அந்த ஆன்மா அவரது குடும்பத்தை வழி நடத்தி உதவ எல்லாம் வல்ல பரமனை வேண்டுகிறேன்.

கல்மனம் கொண்ட எனது இதயத்தையும் கரையச் செய்து என்னை வாய் விட்டு அழவைத்துச் சென்ற சகோதரி மாதரசியின் ஆன்மா சாந்தியடைய இறைவனைப் பிரார்த்திக்கிறேன். சிவகணங்களில் ஒருவராக அவர் விளங்குவார் என்பதில் எனக்கு எந்த எவ்வித ஐயமும் இல்லை.

சொல்லிய பாட்டின் பொருளுணர்ந்து சொல்லுவர்

செல்வர் சிவபுரத்தின் உள்ளார் சிவனடிக் கீழ்ப்
பல்லோரும் ஏத்தப் பணிந்து.

(மணிவாசகப் பெருமானின் சிவபுராண வரிகள்)

திருச்சிற்றம்பலம்.

பயணக் கட்டுரையை தொடர்வதில் மீண்டும் தாமதம் ஏற்பட்டுள்ளது. அடியார்கள் பொறுத்துக் கொள்ள வேண்டுகிறேன். கூடிய விரைவில் தொடருகிறேன்.

'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

6.பத்தர் பரசும் பசுபதிநாதம் - நேபாள யாத்திரை - 2011

2011-10-31T08:55:00.000+05:30

பசுபதிநாதம்.

நேபாள யாத்திரை - 2011

கங்காதரன்

(நன்றி : கூகிள் விக்கிபீடியா)

தெள்ளுநீர்க் கங்கைச் சடையுடையாய் போற்றி

உள்ளுவோர்க்கு ஆரமுதம் ஆனாய் போற்றி

பசுபதிநாதனே போற்றி போற்றி.

இடுகை: ஆறு

25.09.2011 - இரயில் பயணங்களில்...

A.C.யில் உறங்குவதை நான் விரும்புவதில்லை. இல்லத்தில் கூட எனது அறையில் தரையில் தரைவிரிப்பில் படுத்துறங்கும் வழக்கம் உள்ளவன் நான். வேறு வழியில்லாமல் நீண்டதூ(நே)ரப் பயணம் என்பதால் ஏ.சி. இரயில பெட்டிப் பயணத்தை ஏற்றுக் கொள்ளவேண்டி வந்தது. ஒரு சில வசதிகளுக்காக குழுவினர் ஒன்றாக பயணிக்க வேண்டியதின் கட்டாயமும் ஒரு காரணம்.

தினமும் காலையில் நாலரை மணிக்கே எழுந்து விடும் பழக்கம் உடைய நான் ரயிலில் பயணிப்பதால் ஐந்து மணிக்கு அலாரம் வைத்தேன். அதிகாலை ஐந்து மணிக்கு எனது மொபைல் போன் அலாரம் அடித்து என்னை உசுப்பி எழுப்பியது. முந்தைய நாளில் அதிகாலை இரண்டு மணிக்குத் தான் உறங்கிய நான் அலாரம் சத்தம் கேட்டு கண் விழித்த அதே நேரத்தில் கோரக்பூரில் இருந்து கீதா பிரஸ் விஷ்ணுஜி என்னுடன் பேசினார். எத்தனை மணிக்கு வண்டி விஜயவாடா ரயில் நிலையத்துக்கு வரும் என்று விசாரித்தார். எனது கோச் நெம்பர், பெர்த் நெம்பர் போன்றவற்றை குறித்துக் கொண்டார். அவரது நண்பர் திரு.பிரசாத் எங்களுக்காக அரிசி மற்றும் சில மளிகை சாமான்களை வாங்கி கொண்டு வந்து எங்களிடம் சேர்ப்பார் எனவும் அவற்றை வாங்கி கொண்டுவர என்னிடம் விஷ்ணுஜி கூறினார். விஜயவாடா அன்பர் பிரசாத்தின் செல்பேசி எண் தந்து குறித்துக் கொள்ளச் சொன்னார். ரயில் வரும் நேரத்தை அந்த அன்பருக்கு நான் அவரது செல்பேசியில் அழைத்து சொன்னேன். அவரும் அதைக் குறித்து கொண்டார். என்னைச் சந்திக்க வரும் விஜயவாடா அன்பருக்கு தெலுங்கு மட்டுமே பேசத் தெரியும். எனக்கு தெலுங்கு மற்றவர் பேசக் கேட்டு புரிந்து கொள்ள முடியும். ஆனால் சரளமாக பேச வராது. எனினும் அவரிடம் செய்திகளை ஒருவாறாக பரிமாற என்னால் முடிந்தது. விஜயவாடா ரயில் நிலையத்தில் திரு.பிரசாத் வந்திருந்து பொருட்களை எங்களிடம் சேர்த்தார். அவருக்கு நன்றி தெரிவித்து பிளாட்பாரத்தில் பேசிக் கொண்டிருந்த நேரத்தில் மீண்டும் கோரக்பூரில் இருந்து திரு விஷ்ணுஜி என்னுடன் மொபைலில் தொடர்பு கொண்டு பொருட்கள் வந்து சேர்ந்ததா என்று விசாரித்து அறிந்து கொண்டார்.

நான் சென்னையில் இருந்து புறப்படுவதற்கு ஒருவாரம் முன்னதாகத் துவங்கி சென்னை வந்து அவரவர் வீடு வந்து சேரும் வரை எங்களது பயணத்தின் போது விஷ்ணுஜி காட்டிய பேரன்பையும், ஆதரவினையும் வார்த்தைகளால் விவரிக்க இயலாத அளவுக்கு இருந்தன. அன்பு நிறை பண்பாளர் தேவ் அவர்கள் மூலம் கிடைத்த இந்த ஆதரவு திருவருட்பயனால் விளைந்தவை என்பதை உணர்ந்து இறைவனுக்கு இதயம் நிறைந்த நன்றிகளைச் சொன்னேன்.

காலைக் கடன்களை முடித்ததும் எங்கள் குழுவினருடன் சேர்ந்து சிவபுராணம் பாடினோம். எங்கள் அணியில் திருமதி மாதரசி மிக அற்புதமாக சிவபுராணம் சொன்னார். இல்லத்தில் இருந்து கொண்டு வந்த உணவுப் பொட்டலங்களில் இருந்து சிற்றுண்டி அருந்தினோம். இட்லி, சப்பாத்தி, கொஞ்சம் ஸ்வீட் மற்றும் காரம் என கலவையாக காலைச் சிற்றுண்டி படலம் நிறைவேறியது. அதன் பின்னர் சற்று நேரம் பேசிக் கொண்டிருந்தோம்.

இறையவன் அமைத்த சத்சங்கம்.

என்னுடன் பயணம் செய்பவர்களைப் பற்றி ஒரு சிறிய அறிமுகம். திரு.நடராஜன், திருமதி நடராஜன், திரு.ராமராஜ், திருமதி மாதரசி ராமராஜ், திரு.மங்களேஸ்வரன், திருமதி.மாலதி மங்களேஸ்வரன், குமாரி ஷோபனா மங்களேஸ்வரன் என்று என்னைத் தவிர்த்து ஏழு பேர்கள் எனது சஹாயாத்திரிகளாக அமைந்தார்கள்..

கடந்த பத்து வருடங்களாக இந்தியா முழுவதும் சுற்றுப் பயணம் செய்து வரும் இவர்கள் அனைவரும் சிறந்த இறைஅடியார்கள். எளிமையை மிகவும் விரும்புபவர்கள். செல்லும் இடங்களுக்கேற்ப தங்கள் வாழ்க்கை முறையை அமைத்து கொள்ளும் சகிப்புத் தன்மை படைத்தவர்கள். அமைதி விரும்பிகள். ஒருவருக்கொருவர் அனுசரனையாக இருந்து கொண்டு வருபவர்கள். திரு.நடராஜன் விரைவில் ஓய்வு பெற இருப்பவர். ஹிந்தி நன்றாக பேசுவார். எங்களது மொழிபெயர்ப்பாளராக இவர் இருந்தார். தெலுங்கைத் தாய்மொழியாக கொண்டவர். ஹூப்ளியில் பத்து ஆண்டுகளுக்கு மேலாக பணி புரிந்தவர். கன்னடமும் நன்றாக பேசுவார். அவரது துணைவியார் பழகுவதற்கு இனிய மென்மையான சுபாவம் கொண்டவர். இவர்களது பிள்ளைகளுக்கு திருமணமாகி அவர்களும் பிள்ளை குட்டிகளோடு வளமாக வாழ்ந்து வருகிறார்கள். இந்த அடியார்கள் அனைவரும் அலுவலகம் மூலமாக அறிமுகமாகி 20வருடங்களுக்கு மேல் குடும்ப நண்பர்களாக இருப்பவர்கள். ஒருவருக்கொருவர் வாழ்வு தாழ்வுகளில் இணைந்தே உறவாடி, ஒத்தாசையாக இருந்து வாழ்க்கையை செம்மையாக வாழ்பவர்கள்.

திரு.ராம்ராஜ், திருமதி ராம்ராஜ் ஆதர்ச தம்பதியினர். அரவிந்த அன்னையின் பால் மாறாத பக்தி பூண்டவர்கள். ஆழ்நிலைத் தியானம், ரெய்கி, போன்ற பயிற்சிகளை தொடர்ந்து செய்து வருபவர்கள். மற்றவர்களுக்கு பயன்தரும் இக்கலைகளை ஒரு ஆத்மார்த்த சேவையாக செய்துவருபவர்கள். இவர்களின் இரு மகள்களில் ஒருவருக்கு ஏற்கனவே திருமணமாகி விட்டது. மற்றொரு மகள் ஒரு ஐ.டி. நிறுவனத்தில் பணி புரிகிறாள். அந்தப் பெண்ணும் இந்த யாத்திரையில் கலந்து கொள்வதாக இருந்தது. பணியிடத்தில் லீவு கிடைக்காததினால் வரவில்லை.

சஹயாத்திரிகளின் பிள்ளைகளை சிறு குழந்தையாக இருக்கும் போதே பார்த்திருக்கிறேன். இப்போது அவர்களில் பலர் திருமணமாகி குழந்தை குட்டிகளோடு சௌக்கியமாக இருக்கிறார்கள். இவர்களில் மங்களேஷ்வர் தம்பதியினரின் மகள் குமாரி ஷோபனா சிறுவயதில் இருந்தே தங்கள் பெற்றோருடன் அகில இந்திய சுற்றுப் பயணத்தை மேற்கொண்டு வருபவள். வருகிற ஜனவரியில் அவளுக்கு திருமணம் நிச்சயமாகி இருக்கிறது. அதற்குள் ஒரு நல்வாய்ப்பாக மகளுடன் காத்மாண்டு போய் வந்து விடலாம் என்று அழைத்து வந்திருக்கிறார்கள். திருமணம் நிச்சயமாகி விட்ட நிலையில் இந்த பெண்ணை அழைத்து வர வருங்கால கணவனிடமும், மாமனார்-மாமியாரிடமும் அனுமதி பெற்று அழைத்து வந்திருக்கிறார்கள். அடிக்கடி போனில் தனது வருங்கால கணவனிடம் பேசி தான் பத்திரமாக இருப்பதை தெரிவித்துக் கொண்டிருந்தது அந்தப் பெண்.

இரயில் தொடர்ந்து காலதாமதமாகவே சென்று கொண்டிருந்தது. குழு அன்பர்கள் தங்களது பயண அனுபவங்களை சுவாரஸ்யமாக என்னுடன் பகிர்ந்து கொண்டு வந்தார்கள். இந்தக் குழுவின் மற்றொரு அங்கத்தினரான அன்பர் சந்திரகுமாரால் இந்த முறை யாத்திரையில் கலந்து கொள்ள இயலவில்லை. ஆனால் அவர் எண்ணமெல்லாம் எங்களுடனே இருந்தது. மணிக்கொரு தடவை போன் செய்து எங்களுடன் பேசிக் கொண்டே இருந்தார். ரயில் எங்கே செல்கிறது? சாப்பிட்டாச்சா? என்றெல்லாம் விசாரித்து கொண்டு இருந்தார். யாத்திரையில் கலந்து கொள்ள முடியவில்லை என்பதற்காக மிகவும் வருந்தினார். திரும்பி சென்னை வந்து சேரும் வரை நண்பர் சந்திரகுமார் எங்களோடு தொடர்ந்து தொடர்பு கொண்டு உரையாடியது நெஞ்சினை நிறைத்து, நெகிழவும் வைத்தது. அன்பர் சந்திரகுமாரைப் பற்றி இங்கே குறிப்பிட்டாக வேண்டும். திரு.சந்திரகுமார் ஒரு சிறந்த சிவனடியார். திருக்கோவில்களில் உழவாரப் பணிகளை செய்துவருபவர். சென்னையில் உள்ள உழவாரப் பணி குழுவில் பிரதி மாதம் முதல் ஞாயிறு அன்று முன்னதாகவே திட்டமிடப்பட்ட கோவிலுக்கு காலையிலேயே சென்று உழவாரப் பணியில் ஈடுபடுவார். யாத்திரையில் என்னுடன் வரும் அன்பர்கள் உழவாரப் பணியில் கலந்து கொள்ளுவார்கள். இந்த அளவுக்கு ஈடுபாடு கொண்ட அடியார்களுடன் யாத்திரையில் பயணிப்பது எனக்கு மிகவும் மகிழ்ச்சி அளித்தது.

எல்லாம் அவன் செயல்.

அன்பர்.சந்திரகுமாருக்கு பதிலாக நான் முதன் முறையாக இந்த குழுவினருடன் யாத்திரையில் கலந்து கொள்கிறேன். பத்தாண்டுகளாக இவர்களது சத்சங்கத்தை இழந்திருக்கிறேன் என்பதை எண்ணி வருந்தினேன். எனது சூழல்கள் அப்படி அமைந்திருந்ததும் வினைப்பயனே. இப்போது இவர்களுடன் இணைந்திருப்பது இறைவனின் அருட்பயனே என்று மனநிறைவு கொண்டேன். ஆட்டுவிப்பதும், கூட்டுவிப்பதும் அந்த ஆடல்வல்லானின் திருவிளையாடல் அல்லவா?

இவர்கள் தங்களது குழுவில் வேறொருவரை சேர்ப்பதற்கு மிகவும் யோசனை செய்வார்கள். எல்லோருமே அனுசரணையுடன், ஒத்தியல்புடன் பழகுவார்களா என்ற ஐயம் அவர்களுக்கு உண்டு. என்னுடன் இருபது வருடங்களுக்கு மேலாக பழக்கம் இருந்தும் பயணத் திட்டங்களை பற்றி எதுவும் கூறியதில்லை. நேபாள யாத்திரை செல்ல ரயில் முன்பதிவு கூட அவர்கள் முன்னமேயே செய்துவிட்டார்கள். கிட்டத்தட்ட பத்துநாட்கள் கழித்து பேச்சு வாக்கில் என்னிடம் இது பற்றி சொல்லிய போதுதான், நானும் கலந்து கொள்ள எண்ணினேன். அவரசரம் அவசரமாக முன்பதிவு செய்யச் சென்ற போது இரண்டாம் வகுப்பு ஏ.சி.யில் வெயிட் லிஸ்ட் ஆகி இருந்தது. எனினும் மூன்றாம் வகுப்பு ஏ.சியில் கோரக்பூர் போக, திரும்ப சென்னை வர படுக்கைகள் கிடைத்தன. அவற்றை உடனே பதிவு செய்து கொண்டு நேபாள யாத்திரையில் நான் கலந்து கொள்வதை உடனே உறுதிப்படுத்திக் கொண்டேன்.

(பகிர்தல் தொடரும்)

'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

5. பக்தர் பரசும் பசுபதிநாதம் - நேபாள யாத்திரை - 2011

2011-10-28T18:41:00.007+05:30

நேபாளப் பயணக் கட்டுரை- பத்தர் பரசும் பசுபதிநாதம்

ஓம் நமசிவாய.

எந்தையும் தாயுமாய் இருந்தாய் போற்றி.

சிந்தை முழுதும் நிறைந்தாய் போற்றி.

பசுபதிநாதனே போற்றி போற்றி.

இடுகை: ஐந்து

நேபாளப் பயணம் துவங்குகிறது.

14.09.2011: சென்னையில் இருந்து கோரக்பூருக்கு (ரயில் பயணமாக).

எங்கள் பயணத் திட்டப் படி செப்டம்பர், 2011 பதினான்காம் தேதி அன்று ரப்திசாகர் எக்ஸ்ப்ரஸ் (திருவனந்தபுரம்-கோரக்பூர்) சென்னை சென்டிரல் ரயில் நிலையத்தில் இருந்து இரவு பதினொன்று இருபதுக்கு புறப்படவேண்டும். ஆனாலோ திருவனந்தபுரத்தில் இருந்து வரும் ரயில் அன்று சென்டிரல் வருவதற்கு தாமதாமாகிக் கொண்டிருந்தது. காரணம் அதற்கு முந்தைய தினம் (13.09.2011 அன்று) அரக்கோணம் அருகே ஏற்பட்ட மின்தொடர் வண்டி மற்றொரு ரயிலின் மேல் மோதியதால் ஏற்பட்ட துயர விபத்தின் காரணமாக சென்னைக்கு வரும் ரயில்களின் போக்குவரத்து வெகுவாக பாதிக்கப்பட்டிருந்தது. எனவே பல இரயில்கள் மாற்றுப் பாதையில் சென்று கொண்டிருந்தன.

பலமணிநேர காலதாமதம் தவிர்க்க முடியாததாக அமைந்து விட்டது. அன்று முழுவதும் அடிக்கடி கட்டுப்பாட்டு அறைக்கு போன் போட்டு அரக்கோணம்-சென்னை பாதை சீரமைக்கப் பட்டு விட்டதா? இரயில்கள் போக்குவரத்து சீராகி விட்டதா? என்று அடிக்கடி கேட்டுக் கொண்டிருந்தோம். தென்னக ரயில்வே தலைமை அலுவலகத்தில் பணி புரியும் எனது நண்பர்கள் எங்களுக்காக இந்த தகவல்களை அடிக்கடி சேகரித்து சரிபார்த்து சொல்லிக் கொண்டிருந்தார்கள்.

அன்று மாலை இல்லம் வந்து பயண ஏற்பாடுகளை கவனித்தேன். என் மனைவி பயணத்தில் கலந்து கொள்ளவில்லை. ஆனால், நிறைய சப்பாத்திகள், தொட்டுக் கொள்ள வெங்காயம்-தக்காளி தொக்கு மற்றும் புளிசாதம் போன்றவற்றை தயாரித்து வைத்திருந்தாள். அவற்றை பேக் செய்து எடுத்துக் கொண்டேன். இறையடியார் சேகர்ஜி என்னுடன் போனில் பேசினார். அவர் சென்டிரலில் வந்து எங்களை வழியனுப்ப ஆர்வமாக இருந்தார். அவருடன் மழலையும் சேர்ந்து வர திட்டமிருந்ததாம்.

சென்டிரல் ரயில் நிலையத்தில் நிறைய பயணிகள் கூட்டம் இருந்ததால், நிற்க இடமில்லாமல் இருந்தது முதல் நாள் இரவில் இருந்து பயணிகள் தாங்கள் புறப்படவேண்டிய இரயிலுக்காக காத்திருந்தார்கள். அந்த சந்தடியில் இறையடியார்கள் வந்தால் அவர்களுக்கு தொந்தரவாக அமையும் என்பதினால் அன்பர சேகர்ஜியை சென்டிரல் ரயில் நிலையத்துக்கு வரவேண்டாம் என்று கூறிவிட்டேன். அவர் பயணம் வெற்றியடைய வாழ்த்துக் கூறினார். சற்று நேரம் கழித்து மழலையும் என்னுடன் பேசியது. சாதுவாக பயணத்தை முடித்து வரச் சொல்லி வாழ்த்தியது மழலை. எனது துணைவியார் இல்லாமல் தனியாகச் செல்வதை சாதுவாகப் (சாமியார் மாதிரி) போய் வாருங்கள் என்று (நகைச்)சுவையாக குறிப்பிட்டார் மழலை.

இரத்தினமாலை குழும இறையடியார்கள் ஒவ்வொருவரும் எனது பயண வெற்றிக்கு மின்மடல் மூலமாக வாழ்த்து தெரிவித்தார்கள். மின் தமிழ் மடலாடற்குழும ஆன்றோர்களும் மின்மடல் மூலமாக வாழ்த்து சொல்லி எனது பயணத்தினை வளமாக்கினார்கள். மறவன்புலவு ஐயா, இன்னம்பூரார் போன்ற மற்றும் பல அறிஞர்கள் எல்லாம் போனில் அழைத்து வாழ்த்திட நான் என்ன புண்ணியம் செய்திருப்பேன்? என்று எண்ணி எண்ணி இறுமாந்தேன். இந்த பெரியோர்களின் அன்பும், ஆசியும் எங்களுக்கு பயண முழுமையும் ஆதரவாகவும், பக்க பலமாகவும் அமைய உதவியது.

இரவு எட்டு மணிக்கெல்லாம் சென்டிரல் இரயில நிலையம் சென்று விட்டேன். பின்னர் சக யாத்திரிகள் ஒவ்வொருவராக வந்து சேரத் தொடங்கினர். இரவு ஒன்பதரை அளவில் அனைவரும் ஒரு இடத்தில் குழுமினோம். நிற்கக் கூட இடம் இல்லாமல் ரயில் நிலையத்தில் கூட்டம் அலைமோதியது. கிட்டத்தட்ட இருபத்து நான்கு மணி நேரமாக இரயில்கள் வந்து சேர்தல், புறப்படுதலில் நிச்சயமற்ற தன்மை நிலவியதால் அனைவரும் எரிச்சலுடனும், சலிப்புடனும் காணப்பட்டார்கள். அந்த மன நிலையில் அவர்களுடன் நாங்களும் சேர்ந்து கொண்டோம். காரணம் எங்களுக்கு தெரியவந்த சேதி தான். அதாவது முந்தைய நாளிரவில் கேரளாவில் இருந்து வரும் ரயில்கள் அரக்கோணத்துக்கு முன்னதாக திருப்பி விடப்பட்டு ரேணிகுண்டா அல்லது கூடூர் இரயில நிலையத்தில் இருந்து புறப்பட்டனவாம். அந்த வண்டிகளில் முன்பதிவு சென்னைப் பயணிகள் சென்னையில் இருந்து வேறொரு ரயிலில் பயணித்து கூடூர்/ரேணிகுண்டா போய் அங்கு காத்திருந்த தத்தம் இரயில்களில் ஏறிச் சென்றிருக்கிறார்கள். இன்றும் அதுபோல நிகழுமா என்ற எதிர்பார்ப்பும் கவலையும் எங்களை கவ்விக் கொண்டன. இந்த மாதிரி நேரங்களில் முறையான அறிவிப்புகளை செய்யாமல் காத்திருக்கும் பயணிகளை சலிப்படையச் செய்வதில் இருந்து இரயில்வே நிர்வாகம் இன்னும் விடுபடவில்லை என்பதையும் வருத்தத்துடன் இங்கே குறிப்பிட்டே ஆகவேண்டும். பரபரப்புடன் மீட்பு நடவடிக்கைகளில் ஈடுபடும் நிர்வாகம் இன்னமும் மக்கள்தொடர்பில் சரியாக முன்னேறவில்லை என்பது வருத்தத்துக்குரிய விஷயமாகவே இருக்கிறது. எந்த பிளாட்பாரத்தில் எந்த இரயில புறப்படும் என்று அறிவிக்கும் டிஸ்ப்ளே பலகையில் உள்ள செய்தியும், CCTVயில் அறிவிக்கப்படும் செய்திகளும் பொருந்தவே இல்லை.

இதனால் ஏற்பட்ட சங்கடங்கள் என்னவென்றால் டிஸ்ப்ளே பலகையில் பார்த்துவிட்டு ஒன்றாம் எண் பிளாட்பாரத்தில் நாங்கள் காத்திருக்க, நீண்ட நேரம் கழித்து CCTVயில் அறிவிக்கப்பட்ட பிளாட்பாரம் எண் வேறாக இருந்தது. இதனால் ஒன்றாம் எண் நடை மேடையில் இருந்து எட்டாம் எண் நடைமேடைக்கு பயணிகள் கூட்டத்தில் நீந்தி தவித்து வர வேண்டியதாயிற்று. ஏனெனில் எனது சகபயணிகள் ஏழு பேரில் ஒருவர் மாற்றுத் திறனாளி. ஒரு செயற்கைக் காலில் நடந்தாக வேண்டும். மற்ற இருவர் வயதானவர்கள். மற்ற நால்வரில் ஒரு இளைஞி தவிர மற்ற எல்லாருமே ஐம்பது வயதினைக் கடந்த ஆண் பெண்கள். பத்து நாள் பயணம் என்பதால் பெட்டிகள் நிறைய வந்திருந்தன. கடந்த ஆண்டு அமர்நாத் யாத்திரை சென்று வந்த அனுபவம் காரணமாக எனது லக்கேஜ்களை பார்த்து பார்த்து எடுத்து வைத்திருந்தேன். சாப்பாட்டு பை ரயிலில் தீர்ந்து விடும். மற்ற பெட்டி/பைகள் சமாளிக்கக் கூடிய எடையுடன் அமைத்துக் கொண்டிருந்தேன். பிறர் உதவியின்றி இழுத்து/தூக்கிச் செல்லக்கூடியவிதமாக அவைகள் இருந்தன.

எது எப்படி இருப்பினும் நீண்ட நேர காத்திருத்தல், சலிப்பு, தூக்கம் இவற்றை எல்லாம் தாண்டி நள்ளிரவு/அதிகாலை பன்னிரண்டரை மணிக்கு ஒருவழியாக நாங்கள் பயணிக்க வேண்டிய ரப்திசாகர் எக்ஸ்ப்ரஸ் சென்டிரல் வந்து சேர்ந்தது. எங்களது உடைமைகளை எடுத்துக் கொண்டு இரயிலில் எங்களுக்காக முன்பதிவு செய்யப்பட்ட இருக்கைகளில் அமர்ந்து கொண்டோம். அதன் பின்னர் ஒரு மணி நேரம் கழித்து அதிகாலை ஒன்றரை மணிக்கு சென்டிரலில் இருந்து எங்களது வண்டி புறப்பட்டது. அவரவர் இல்லங்களுக்கு போன் செய்து விவரங்களைத் தெரிவித்து விட்டு, நல்லபடியாக பயணம் நடைபெற வேண்டும் என்று எல்லாம் வல்ல பசுபதிநாதரையும், அன்னை பராசக்தியையும் வேண்டிக்கொண்டு உறங்கச் சென்றோம்.

(பகிர்வுகள் தொடரும்)

அஷ்வின்ஜி.

4. பக்தர் பரசும் பசுபதிநாதம் - நேபாள யாத்திரை - 2011

2011-10-28T18:39:00.000+05:30

நேபாளப் பயணக் கட்டுரை.

பத்தர் பரசும் பசுபதிநாதம்.

இடுகை : நான்கு - பயண முன்னேற்பாடுகள்.

வைத்த நிதிபெண்டிர் மக்கள்குலங் கல்வியென்னும்
பித்த உலகிற் பிறப்போ டிறப்பென்னுஞ்
சித்த விகாரக் கலக்கம் தெளிவித்த
வித்தகத் தேவற்கே சென்றூதாய் கோத்தும்பீ.

(திருவாசகம் - மாணிக்கவாசகப் பெருமான்)

இரவில் ஒளிரும் அருள்மிகு பசுபதி நாதர் திருக்கோவில்

(நன்றி: கூகிள் இமேஜஸ்)

எங்கள் அனைவருக்குமே நேபாளம் செல்வது முதல் முறை என்பதால் நேபாளப் பயணம் பற்றிய நிறைய ஐயங்கள் இருந்தன.

திருக்கயிலைக்கு நேபாளம் வழியாக யாத்திரை சென்று வந்த திருவாளர்கள் கீதாசாம்பசிவம் தம்பதியினரை நேரில் சந்தித்து ஆலோசித்தேன். செப்டம்பர் மாதம் பதினான்கு தேதிகளில் நாங்கள் புறப்படுவதை கேட்ட கீதாஜி "அந்த சமயம் நேபாளத்தில் மழைக் காலமாய் இருக்குமே. சரியாக விசாரித்துத் தானே பயணம் செல்ல திட்டமிட்டீர்கள்?" என்று கேட்டார். செப்டம்பர் பதினைந்தில் இருந்து அக்டோபர் பதினைந்து வரை நல்ல பருவ நிலை நிலவும் சமயம் என்பதை விசாரித்துத் தெரிந்து கொண்ட பின்னரே பயணத்துக்கு திட்டமிட்டிருப்பதை கூறினேன். கீதா-சாம்பசிவம் தம்பதியர் எங்கள் பயணம் வெற்றி பெற ஆசி கூறி அனுப்பினார்கள்.

மேலும் விவரங்களைப் பெற கூகிளாரின் உதவியுடன் நேபாளம் பற்றிய செய்திகளை திரட்டினேன். எனது குழுவில் இருக்கும் திரு.மங்களேஸ்வர் இணையத்தில் இருந்து நிறைய செய்திகளை திரட்டித் தந்தார்.

எண்ணங்கள் தோறும நேபாளம் நிறைந்திருக்க, நேபாளம் பற்றி திரு.அருசோ எழுதியுள்ள புத்தகத்தை மயிலை இராமகிருஷ்ணமடம் நூலகத்தில் இருந்து வாங்கி வந்து படித்தேன். ஏற்கனவே நேபாளம் பற்றி திருமதி கீதா சாம்பசிவம் அவர்கள் தனது கயிலை பயணக் கட்டுரையில் குறிப்பிட்டு இருந்தார்கள். மற்றும் எனது அலுவலக நண்பர் திரு சுதர்ஷன் பிரசாத் பத்து ஆண்டுகளுக்கு முன்னர் நேபாள பயணம் சென்று வந்தவர் அவரும் தனது அனுபவங்களை பகிர்ந்து கொண்டார். கடந்த ஆண்டு வைஷ்நோதேவிக்கும், அமர்நாத்துக்கும் எங்களுடன் தனது சகோதர, சகோதரியுடன் பயணம் வந்த திரு.சுதர்ஷன் பிரசாத், தவிர்க்க முடியாத அலுவலகப் பணி காரணமாக எங்களுடன் இந்த முறை வர இயலவில்லை.

சுவாமி சித்பவானந்தாவின் ''திருக்கயிலை யாத்திரை'', மற்றும் சிங்கை கிருஷ்ணன் அவர்களின் நேபாள, கயிலை யாத்திரை பற்றிய புத்தகங்களைப் படித்து நேபாளம் பற்றிய செய்திகளை மனதில் குறித்துக் கொண்டேன்.

(பகிர்வுகள் தொடரும்)

அஷ்வின்ஜி

தீப ஒளி வாழ்த்துக்கள். இன்ப ஒளி பரவட்டும்.

2011-10-26T08:55:00.001+05:30

இனிய இறையடியார்களுக்கு

என் தீபாவளித் திருநாள்

வாழ்த்துக்கள்.

உங்கள் வாழ்க்கையின்

எண்ணக கோலங்கள் யாவும்

வண்ணக் கோலங்களாக

மிளிர சிவனருள் வேண்டுகிறேன்.

அன்பு ஒளி பரவட்டும்;

இன்பமெங்கும் நிலவட்டும்.

நன்மைஎன்றும் நிலைக்கட்டும்,

தீதெல்லாம் விலகட்டும்.

வாழி நலம் சூழ

இறையருள் பொலிக.

3. பக்தர் பரசும் பசுபதிநாதம் - நேபாள யாத்திரை - 2011

2011-10-23T12:47:00.000+05:30

நேபாளப் பயணம்: பசுபதிநாதரை தரிசித்தோம்.

இடுகை மூன்று.

சிவபாலன் (பசுபதிநாதர் கோவிலுக்கு செல்லும் வழியில்)

திருச்சிற்றம்பலம்.

அன்பைப் பெருக்கி எனது ஆருயிரைக் காக்க வந்த
இன்பப் பெருக்கே இறையே பராபரமே..

தாயுமானவரின் பராபரக்கண்ணி.

பசுபதிநாதர் அழைக்கிறார்.

நான் துவக்கத்தில் குறிப்பிட்டிருந்த சிவனடியார்களை இந்த ஆண்டு தொடக்கத்தில் (மார்ச் ஏப்ரல் மாதங்களில்) தொடர்ந்து சந்தித்து கயிலைப் பயணம் பற்றி பேசினேன். அவர்களுக்கு இந்த ஆண்டு கயிலைப் பயணம் செய்வதில் சில சிரமங்கள் இருந்தன. இந்த அன்பர்கள் குடும்பத்துடன் ஏற்கனவே சார்தாம் யாத்திரை (பத்ரிநாத், திருக்கேதாரம், கங்கோத்ரி, யமுநோத்ரி) மற்றும் இந்தியாவில் வடக்கு, வடமேற்கு, வட கிழக்கு பகுதிகளில் உள்ள மிக பிரசித்தி பெற்ற சிவ/வைணவத் தலங்கள், சக்தி பீடங்களை கடந்த பல ஆண்டுகளாகத் தரிசித்தவர்கள். அந்த வகையில், இந்த ஆண்டு நேபாளம் செல்வதற்கான ஆயத்தங்களில் அவர்கள் ஈடுபட்டு இருந்தார்கள்.

நான் சார்தாம் யாத்திரை இது வரை சென்றதில்லை. கடந்த சில ஆண்டுகளில் ஹரித்வார், ரிஷிகேசம் இரண்டு மூன்று முறை சென்ற அனுபவம் உண்டு. கடந்த ஆண்டு (2010ல்) அமர்நாத்-வைஷ்நோதேவி சென்று வந்த அனுபவம் உண்டு.

இந்த இறையடியார்கள் நேபாள யாத்திரை பற்றிய சிந்தனையில் இருந்ததால் இவர்களது சத்சங்கத்தில் இணைந்து கொண்டு பசுபதிநாதரை தரிசிக்க ஒரு வாய்ப்பினை அம்மையப்பனே எனக்குத் தந்திருப்பதாக உணர்ந்தேன்.

அவர்களது பயணத் திட்டத்தை அறிந்து கொண்டேன். என்னையும் அவர்களுடன் இணைத்துக் கொள்ள தீர்மானித்தேன். கடந்த ஆண்டு அமர்நாத் யாத்திர வந்த அன்பர்களிடம் நேபாளப் பயணம் பற்றித் தெரிவித்து அவர்களையும் எங்களது பயணத்தில் இணைந்து கொள்ள அழைப்பு விடுத்தேன். ஆனால் அவர்களோ, இந்த ஆண்டு பயணம் மேற்கொள்ள இயலாமல் இருப்பதை வருத்தத்துடன் என்னிடம் தெரிவித்து விட்டார்கள். பசுபதிநாதரை தரிசிக்க என்னையும் சேர்த்து பன்னிரண்டு பேர் பதிவு செய்து கொள்ள தயாரானார்கள்.

இதனைத் தொடர்ந்து நேபாள பயணத் திட்டத்தின் முதல் கட்டமாக செப்டம்பர் மாதப் பயணத்திற்கான எங்களது முன்பதிவுகளை ஜூலை மாதமே செய்தோம்.

எங்களது பயணத் திட்டம் கீழ்க் காணும் வகையில் இருந்தது.

14-09-2011 அன்று சென்னையில் இருந்து ரப்திசாகர் (Raptisagar Express)எக்ஸ்ப்ரஸ் மூலம் கோரக்பூர்(Gorakhpur) செல்வதற்கான முன்பதிவு.

16-09-2011 அன்று மாலை கோரக்பூரை அடைதல். இரவு கோரக்பூரில் தங்குதல்.

17-09-2011 அன்று காலை கோரக்பூரை விட்டு புறப்பட்டு பஸ் மூலம் சுனாவ்லியை அடைதல். (சுநாவ்லி இந்திய-நேபாளம் எல்லையில் இந்திய பகுதியில் அமைந்துள்ளது. கோரக்பூரில் இருந்து பஸ் மூலம் இந்த ஊருக்குச் செல்ல இரண்டு அல்லது மூன்று மணிநேரம் ஆகும்)

பின்னர் இந்திய எல்லையை கடந்து நேபாள எல்லைக்குள் உள்ள பெலாஹியா என்னும் இடத்தை அடைதல். காத்மாண்டு செல்லும் பஸ்கள் (சிறு நடை தூரத்தில் பைரவா பஸ்/விமான நிலையம் உள்ளது) இங்கே கிடைக்கின்றன. அதன் பின்னர் அங்கிருந்து பஸ் அல்லது கார் மூலம் புறப்பட்டு காத்மாண்டு செல்ல. எட்டு மணி நேரப் பயணம் செய்யவேண்டும்.

17-09-2011 அன்று இரவு காத்மாண்டுவில் தங்குதல்.

18-09-2011: அன்று காலை காத்மாண்டுவில் பசுபதிநாதர் திருக்கோவில், புத்தநீல்கண்டா(ஜலநாராயணர்), புத்தநாத் (ஸ்வயம்புநாத்) மற்றும் குஹ்யேஸ்வரி திருக்கோவில்களை தரிசிப்பது.

இரவு காத்மாண்டுவில் தங்கி விட்டு பின்னர் அங்கிருந்து முக்திநாதம் (சாளக்ராமம்) செல்வது. முக்திநாதர் தரிசனம் பெற்ற பிறகு நேரம் கிடைத்தால் ஜனக்புரி (சீதாபிராட்டியாரின் ஜனனபூமி) செல்வது, பின்னர் லும்பினி (புத்தர் பிறந்த இடம்) செல்வது என பயணத் திட்டம் ஒன்றினை வகுத்துக் கொண்டோம். (எங்களது பயணத் திட்டங்கள் தேவைக்கு ஏற்ற படி மாற்றி அமைக்கக் கூடிய அளவுக்கு இருந்தன).

22-02-02011 அன்று காலை கோரக் பூர் அடைதல், கோரக்னாதர் திருக்கோவிலை தரிசித்தல் அன்று இரவு தங்குதல்.

23-09-2011 அன்று கோரக்பூரில் இருந்து காலை புறப்படும் ரப்திசாகர் விரைவு வண்டியில் பயணித்து 25-0-9-2011 அன்று நள்ளிரவு சென்னை அடைதல்.

மேற்கண்ட வகையில் எங்கள் பயணத் திட்டத்தை வடிவமைத்துக் கொண்ட பின்னர் பயணத்தை மேற்கொள்வதற்கான ஆயத்தங்களுடன் புறப்படுவதற்கான நாளுக்காக ஆவலுடன் காத்திருந்தோம்.

(பகிர்வுகள் தொடரும்)

'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

பத்தர் பரசும் பசுபதிநாதம் - நேபாள யாத்திரை - 2011 - Part 2

2011-10-06T05:25:00.001+05:30

அன்பர்களுக்கு எனது

துர்கா பூஜை வாழ்த்துக்கள்.

நேபாளப் பயணக் கட்டுரை தொடர்கிறது:

பக்தர் பரசும் பசுபதிநாதம் - நேபாள யாத்திரை - 2011

இடுகை இரண்டு:

ஓம் நமசிவாய.

எந்தையும் தாயும் ஆனாய் போற்றி.

சிந்தை முழுதும் நிறைந்தாய் போற்றி.

நான் தற்சமயம் பணிபுரியும் அலுவலகம் சென்னையில் அயனாவரத்தில் உள்ளது. கடந்த 1985 முதல் 1992 வரை இந்த அலுவலகத்தில் பணியில் இருந்த போது நிறைய நண்பர்கள் எனக்கு கிடைத்தார்கள். அவர்கள் அனைவரும் சிவனடியார்கள்.

இப்போது போலவே, அப்போதும் சத்சங்கமும், சாதுசங்கமும் நேர்ந்து கொண்டிருந்தது. பின்னர் நேர்ந்த பணி மாற்றல் காரணமாக, எனக்கு அந்த இறையன்பர்களுடனான தொடர்பு விட்டுப் போயிற்று. நான் சென்ற இடங்களில் அதற்கேற்ற சத்சங்கங்கள் அமைந்ததும் ஒரு காரணமாயிற்று.

இருப்பினும், பழைய நண்பர்களுடனான தொடர்புகள் முற்றிலும் அறுந்து போகவில்லை. ஏதாவது ஒரு ஆன்மீகம் தொடர்பான நிகழ்ச்சியில் நான் அவர்களை தொடர்ந்து சந்தித்து வந்தேன். பின்னர் மீண்டும் 2009ல் அதே அலுவலகத்துக்கு சென்ற போது அந்த நண்பர்களை மீண்டும் சந்திக்க மற்றும் ஒரு வாய்ப்பு கிடைத்ததும் சிவனருளே.

கடந்த ஆண்டு(2010) அமரநாதம் செல்வதற்கான ஆரம்ப விதை தொண்ணூறுகளில் எனக்கு அயனாவரம் அலுவலகத்தில்தான் தூவப்பட்டது என்பதை எனது அமர்நாத் பயணக் கட்டுரையில் தெரிவித்திருக்கிறேன். அன்பர்களுடன் அமரநாதம் சென்று வந்த பின்னர், இமயம் என்னை ஈர்க்க ஆரம்பித்துவிட்டது. இந்த ஆண்டும் ஒரு பயணத்தை மேற்கொள்ளவேண்டும் என்ற எண்ணம மேலோங்கி இருந்தது. பின்னர் எங்களது தினசரி மதிய இடைவேளை சந்திப்பின் போது அடுத்த பயணம் எங்கே, எப்போது, எப்படி என்ற சுவையான விவாதங்கள் துவங்கின.

இந்த முறையும் அமர்நாத் செல்லலாம் என்று சில நண்பர்கள் கூறினர்; சிலர் சார்தாம் யாத்ரா (பத்ரி, கேதார், கங்கோத்ரி, யமுநோத்ரி) செல்லலாம் என்று கூற, எனக்கோ அடுத்த யாத்திரை திருக்கயிலாயமாக அமைய வேண்டும் என்ற எண்ணமே மேலோங்கி இருந்தது. கயிலைப் பயணம் பற்றி நண்பர்களிடம் பேச ஆரம்பித்ததும் அவர்களுக்கும் கயிலை யாத்திரையில் ஆர்வம் துளிர் விட்டது.

ஆனால், கயிலாய யாத்திரைக்கு பாஸ்போர்ட் தேவை. அது எங்களிடம் இல்லை. எனவே பாஸ்போர்ட் பெற மனுக்களை பெற்று விண்ணப்பித்தோம். எந்த தொல்லையும் இன்றி புத்தாண்டின் போது (ஜனவரி 2011ல்) சிவப்பரிசாக பாஸ்போர்ட் எங்களை வந்து சேர்ந்தது.

ஏற்கனவே அமர்நாத் சென்ற குழுவினரிடையே திருக்கயிலாய யாத்திரை செல்வது பற்றி தொடர்ந்து சிந்தனை செய்து வந்தோம். ஆனால் நாளாக நாளாக அவர்களது தவிர்க்க இயலாத பிரச்சினைகள் காரணமாக திருக்கயிலைப் பயணத்தை துவங்க முடியாத நிலையில் இருப்பதை வருத்ததுடன் என்னிடம் தெரிவித்துவிட்டார்கள்.

(பகிர்வுகள் தொடரும்)

'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

அம்பிகையின் அருள் பொலிக.

2011-10-04T21:39:00.001+05:30

துர்கா பூஜை வாழ்த்துக்கள்.

தனம் தரும் கல்வி தரும் ஒரு நாளும் தளர்வு அறியா

மனம் தரும் தெய்வ வடிவும் தரும் நெஞ்சில் வஞ்சம் இல்லா
இனம் தரும் நல்லன எல்லாம் தரும் அன்பர் என்பவர்க்கே
கனம் தரும் பூங்குழலாள் அபிராமி கடைக்கண்களே. (அபிராமி அந்தாதி.)

தாயே சரணம்; நீயே சரணம்

இந் நன்னாளில்

எல்லா உள்ளங்களிலும், இல்லங்களிலும்

முப்பெருந்தேவியரும் குடிகொண்டு

அனைத்து நலமும், வளமும்

அருள பிரார்த்தனை செய்கிறேன்.

அஷ்வின்ஜி.

இப் பிரபஞ்சத் துகளில் 'நான்' யார்?

பத்தர் பரசும் பசுபதிநாதம் - நேபாள யாத்திரை - 2011

2011-10-02T23:38:00.000+05:30

திருச்சிற்றம்பலம்.

பத்தர் பரசும் பசுபதிநாதம் - நேபாள யாத்திரை - 2011

இடுகை ஒன்று.

ஓம் நமசிவாய.

முத்திசெய் ஞானமும் கேள்வியு மாய்நிற்கும்
அத்தனை மாயா அமரர் பிரான்தனைச்
சுத்தனை தூய்நெறி யாய்நின்ற சோதியைப்
பத்தர் பரசும் பசுபதி தானென்றே.

(திருமந்திரம் - 2623)

பஞ்சமுக சதாசிவர்

(நன்றி : கூகிள் இமேஜஸ்)

எல்லாம் வல்ல அம்மையப்பனை வணங்கி இந்த ஆண்டு நான் நேபாள யாத்திரை சென்று வந்த அனுபவங்களை பகிர துவங்குகிறேன்.

கடந்த ஆண்டு (2010) நம் பரமர் அமரநாதரையும், அகில புவன அம்பிகை வைஷ்நோதேவியையும் தரிசனம் செய்து வரும் வாய்ப்பு கிடைத்தது. அமர்நாத் சென்று வந்த பின்னரோ, கொண்டாடும் பக்தர் தம் இதயத்தில் உறையும் ஈசன், பனி உறையும் இமயத்தை தன்னிடமாக கொண்ட நாதன், என் உள்ளத்தில் புகுந்தது மட்டுமின்றி உள்ளத்தை கவர்ந்தும் விட்டார். எனவே, தினம் தோறும எண்ணங்கள், செயல் எல்லாம் அவனே நிறைந்து நிற்க ஆரம்பித்துவிட்டான்.

எந்த அருகதையும் இல்லாத எனக்கு சிவம் காட்டி வரும் அன்பும், ஆதரவும் வார்த்தைகளால் விவரிக்க அரியது என்பதற்கு தின வாழ்க்கையில் நடைபெறும் நிகழ்ச்சிகளே ஆதாரமாக அமைந்து விட்டது. எங்கேயும் எப்போதும் சத்சங்கமாக அமைய சிவபெருமான் ஆசி கிட்டியது.

வெளியூர் பயணிக்கும் போதெல்லாம் அடியார் ஒருவர் எனக்கு அறிமுகம் ஆகிவிடுவார். அவரது உதவிகள் எனக்கு தேவையானதாகவே இருந்திருக்கும். அலுவல் பணியாக செல்லும் போது கூட நான் சந்திக்க நேரிடும் அன்பர் ஒரு இறையடியாராக இருப்பார். எனது தேவைகளும் தடங்கல் ஏதுமின்றி அவனருளால் இனிதே நிறைவேறிவிடும்.

அடியார் அடியார் அடியார்க் கடிமைக்

கடியவனாய் நல்கிட் டடினையும் பூண்டேன்

அடியார் அருளால் அவனடி கூட

அடியா னிவனென் றடிமைகொண் டானே.

(திருமந்திரம் - 2624)

சிவனருளாலே அமைந்த சிவனடியார்களின் சத்சங்கம் என்னை இந்த ஆண்டு நேபாளம் வரை அழைத்து சென்று உலக ஆன்மாக்களுக்கெல்லாம் ஒப்பற்ற தலைவனாக விளங்கும் பசுபதிநாதரை தரிசிக்க செய்தது.

(பகிர்தல் தொடரும்)

'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

அமர்நாத் பயண அனுபவங்களை பற்றி படிக்க இங்கே சொடுக்கவும்:

அமர்நாத் மற்றும் வைஷ்நோதேவி புனித யாத்திரை 2010

சிவனருள் பொலிக :- பசுபதிநாதரைத் தரிசித்தேன். (நேபாளப் பயணம் - 2011)

2011-09-26T19:09:00.000+05:30

தென்னாடுடைய சிவனே போற்றி.

எந்நாட்டவர்க்கும் இறைவா போற்றி.

ஸ்ரீ பசுபதிநாதர் சன்னதி (காத்மாண்டு-நேபாளம்)

2011 செப்டம்பர் பதிநான்காம் தேதி சென்னையில் இருந்து துவங்கிய நேபாளப் பயணம் செப்டம்பர் இருபத்தைந்தாம் தேதியன்று மதியம் ஒரு மணிக்கு எங்கள் குழுவினர் சென்னை திரும்பியதும் நிறைவடைந்தது.

காத்மாண்டுவில் நாங்கள் பசுபதிநாதர், ஜல நாராயணர், மற்றும் சுயம்பு நாதர் என்கிற புத்தநாதர், புராண குகேஸ்வரி தேவி (சக்தி பீடம்), நேப்பாளி கூர்காக்களின் குலதெய்வமான மனகாம்னாதேவி மற்றும் பகவான் புத்தர் பிறந்த லும்பினி போன்ற திருத்தலங்களுக்கு சென்று மனசாரத் தரிசித்தோம்.

எமது பயணம் நல்லபடியாக அமைய வாழ்த்திய அத்துணை அன்பு உள்ளங்களுக்கும் எனது இதய நன்றி.

பயணத்தின் போது தொடர்ந்து எங்களுடன் தொடர்பு கொண்டு நலம் விசாரித்த அன்பர்களுக்கும் எங்கள் நன்றி.

எமது நேபாளப் பயணம் இனிதாக அமைய பெரிதும் உதவிய திரு தேவராஜன் (சென்னை), மற்றும் அவர் மூலம் அறிமுகமாகி கோரக்பூர் சென்ற போது எங்களுக்கு பெருமளவில் உதவி இருக்கும் கோரக்பூர் கீதா பிரஸ் பெரியவர் ஸ்ரீ விஷ்ணு பிரசாத் பட்வாரி, அறங்காவலர் ஸ்ரீ ஈஷ்வர் பிரசாத் பட்வாரி மற்றும் கீதா பிரஸ் அன்பர்கள் அனைவருக்கும் எங்கள் நன்றியைத் தெரிவித்துக் கொள்வதில் பெருமை கொள்கிறேன்.

எங்களுடன் தொடர்ந்து வந்து கொண்டிருக்கும் எல்லாம் வல்ல சிவ பெருமானின் பெரும் பேரருளை மகிழ்ந்து பணிந்து போற்றுகிறேன்.

ஓம் நமசிவாய.

வெகு விரைவில் படங்களுடனும் வித்தியாசமான செய்திகளுடனும் எமது நேபாள பயணக் கட்டுரை தொடர் வெளியாகும்.

'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

விநாயகர் சதுர்த்தி வாழ்த்துக்கள்.

2011-09-01T08:55:00.000+05:30

வேத முதல்வனுக்கே முதல் வணக்கம்

விநாயகர் சதுர்த்தியான இன்று

விநாயகரைப் போற்றி

வழிபடுவதற்கு வசதியாக

ஆதிசங்கரர் பாடிய

கணேச பஞ்சரத்தினத்தின்

பொருளைத் தொகுத்து

வழங்கியுள்ளோம்.

இதை விநாயகரின் முன் பக்தியோடு சொல்லி வழிபடுவோருக்கு தொடங்கும் செயல்கள் யாவும் இனிதே நிறைவேறும்.

தனக்கு மேல் வேறு ஒரு தலைவன் இல்லை என்ற ஒப்பற்ற தனிப் பெருந்தலைவனே!
கஜமுகாசுரனை அழித்து தேவர்களைக் காத்தவனே!
அற்புதம் நிகழ்த்துபவனே! மோதகம் ஏந்தியவனே! சந்திரனைத் தலையில் சூடியவனே!
உயிர்களை முக்தி நெறியில் செலுத்துபவனே!
உன்னை நம்பும் அடியவர்களின் தீவினை களைப் போக்கி கருணை காட்டும் கணபதியே!
உம்மை வணங்குகிறேன்.
தேவாதிதேவனே! பாமரர்களின் அறியாமையைப் போக்குபவனே!
வல்லமை நிறைந்தவனே!
ஆனைமுகனே!
கருணை மிக்க இதயம் கொண்டவனே!
அப்பாலுக்கும் அப்பாலாய் வீற்றிருக்கும் பரம்பொருளே!
எப்போதும் உன் திருவடியை சரணடைந்து வழிபடும் பாக்கியத்தை அருள்வாயாக.
ஓங்கார வடிவினனே!
கருணாமூர்த்தியே!
பொறுமை, மகிழ்ச்சி, புகழ் மிக்கவனே!
எல்லா உயிர்களும் மகிழும்படி நன்மை அருள்பவனே!
பணியும் அன்பர்களின் பிழை பொறுப்பவனே!
அடியார் வேண்டும் வரம் தந்தருள்பவனே!
நித்ய வடிவினே! உன்னை வணங்குகிறேன்.
கன்னத்தில் மதநீர் பொழியும் கஜமுகப் பெருமானே!
சிரிப்பாலே திரிபுர சம்ஹாரம் செய்த சிவபெருமானின் புதல்வனே!
பக்தர்களின் துயர் களைபவனே!
ஊழிக் காலத்தில் உலகத்தைக் காத்தருள்பவனே!
செய்யும் செயல்களின் வெற்றிக்குத் துணைநிற்கும் ஆதிபரம்பொருளே!
உன்னை சரணடைந்து போற்றுகின்றேன்.
ஒற்றைக் கொம்பனே!
கணபதீஸ்வரா!
சிவ பெருமானின் பிள்ளையே!
ஆதிஅந்தமில்லாதவனே!
துன்பம் துடைப்பவனே!
யோகியர் உள்ளத்தில் குடிகொண்டவனே!
உன் திருவடிகளை எப்போதும் சிந்தையில் வைத்து சிரம் தாழ்த்தி வணங்கும் இச்சிறியேனையும் காத்தருள்வாயாக.

விநாயகப்பெருமானின் இத்துதியை அதிகாலையில் பாராயணம் செய்வோருக்கு நோய்நொடிகள் அனைத்தும் விலகும். தோஷம் யாவும் நீங்கும். வாழ்வில் உண்டாகும் துன்பம், தொல்லை யாவும் அடியோடு அகலும். குலம் தழைக்க மழலைச் செல்வம் கிடைக்கும். நற்புகழும், மேம்பாடும் உண்டாகும். அஷ்டமாசித்திகள் கைகூடும்.

எனவே, அந்த விக்ன விநாயகப்பெருமானை வழிபடுவோமாக.

நன்றி: தினமலர்.

வேதாந்த வைபவம் - ஆதி சங்கரரின் "விவேக சூடாமணி"

2011-08-25T22:02:00.000+05:30

அன்று சொன்னது, அர்த்தம் உள்ளது.

"சப்த, ஸ்பர்ச, ரூப, ரச, கந்தம் என்ற ஐந்து ஞாநேந்திரியங்களால் போகம் உணடாகக் கூடும்.

வேடன் எழுப்பும் ஒரு வித ஓசையை (சப்த) கேட்டு மூச்சடக்கி மான் வேடனுக்கு வசப்படுகிறது.

ஸ்பர்ச சுகத்தை நாடி, காட்டுயானை பழகிய பெண் யானையின் மூலமாக மனிதர்களிடம் பிடிபடுகிறது.

விளக்கின் பிரகாசத்தில் (ரூப) வசப்பட்டு விட்டில்பூச்சி மடிகிறது.

சுவைக்கு(ரச) அடிமையாகி மீன் தூண்டிலில் அகப்பட்டு மாய்கிறது.

மணத்தை (கந்த) நாடி மயங்கி வண்டு மலரில் சிக்கிக் கொண்டு இறக்கிறது.

இப்படி ஒரு இந்திரியத்தின் போக அனுபவத்தாலேயே பிராணிகள் உயிரைத் துறக்கின்றன என்றால், ஒரே சமயத்தில் ஐந்து இந்திரிய போகங்களையும் அனுபவிக்க ஆசைப்படும் மனிதனின் கதி என்னவாகும்?

- ஆதி சங்கரர் (விவேக சூடாமணி)

1. சிவானந்தம்-பரமானந்தம்.

2011-07-26T08:06:00.000+05:30

வலைப்பூ அன்பர்களுக்கு பணிவான வணக்கங்கள்.

சுவாமி சிவானந்தர் பேரருளாளர். பிரசங்கி, சங்கீர்த்தன சாம்ராட், ஞானச் சுடர், மக்கள் தொண்டர், தீனதயாளன், அநுபூதி பெற்ற மகான். அவருடைய சொற்பொழிவுகளைப் படிக்கும் போது சுவாமிஜியின் பல்துறை உருவம் நமக்குப் புலனாகும்.

சிவானந்தரைக் கண்டு 'தெய்வத்தைக் கண்டோம்' என்று மக்கள் மகிழ்ந்தார்கள். ஆனால் ஆத்மஞாநியான சிவானந்தரோ மக்கள் உருவில் மகேசனைக் கண்டு உளம் பூரித்தார்.

சுவாமிஜி சொல்லுகிறார்: "எங்கெங்கு சென்றேனோ அங்கெல்லாம் விராட்-நாராயணன்து தரிசனம் எனக்குக் கிடைத்ததது. ஆயிரமாயிரம் முகங்களும், ஆயிரமாயிரம் கைகளும், கால்களுமுடைய அந்த நாராயணனை என்னைச் சுற்றிலும் கண்டு அவனது மார்பில் தவழ்ந்தேன்".

"எல்லாம் இறைவன், இறைவனைத் தவிர வேறு எதுவுமே இல்லை" என்ற உணர்விலே வாழ்ந்த மகான் சிவானந்தர்.

("இமயம் முதல் இலங்கை வரை" நூலின் தமிழ்ப் பதிப்பிற்கான முன்னுரையில் இருந்து)

சிவானந்தம்-பரமானந்தம்.

சுவாமி சிவானந்த சரஸ்வதி.

வருகை: 08 Sept 1887

மகாசமாதி: 14 July 1963

1. அமைதிக்கும் பேரின்பத்துக்கும் வழி.

“அமைதியும், இன்பமும் உங்களுக்கு வேண்டுமா? அப்படியானால் பிறருக்கு ஒத்துப்போதல், இணக்கம், விட்டுக் கொடுத்தல் இவை அவசியமானவை. ஒத்துப்போக முடியாததால் தான், சண்டை, பூசல்கள், போர் முதலியவை நிகழுகின்றன. ஒரு குமாஸ்தாவால் தன் மேலதிகாரியோடு ஒத்துப்போக முடிவதில்லை. ஒரு திவானால் மகாராஜாவோடு ஒத்துப்போக முடிவதில்லை. மனஸ்தாபங்களும், சண்டைகளும் தான் விளைவு. கணவன் மனைவி ஒத்துப்போக முடியாவிட்டால், வீடே போர்க்களமாகி விடுகின்றது. ஒத்துப்போகத் தெரிந்து கொண்டால்தான் வீட்டில் அமைதியும் ஆனந்தமும் நிலவும்.

ஆனால் அது அவ்வளவு எளிதல்ல. உங்களுடைய ஆணவத்தை உடைத்துச் சுக்குநூறாக்கி வெளியே தள்ளினால்தான் ஒத்துப்போதல் சாத்தியமாகும். இந்த ராஜச குணம்தான் அமைதியின்மைக்கு அடிப்படைக் காரணம். இது உங்களைக் குனிய விடாது. குழாயில் ஜலம் குடிக்க வேண்டுமானால், வளைந்து தான் குடிக்க வேண்டும். அப்படித்தான் அமைதி, இன்பம், நல்லிணக்கம், என்ற நீரைப் பருக வேண்டுமென்றால், அடக்கமிருந்தால்தான் முடியும்.

அடக்கம் அமரருள் உய்த்து விடும். அடக்கமுள்ளவனால் உலகத்தையே வெல்ல முடியும். அடக்கமுள்ளவனை எல்லோரும் நேசித்து, அன்பு காட்டி, வந்திருக்கிறார்கள். அவனால் தான் ஒத்துப்போகும் பண்பும், இணக்கமும், பிறர் கருத்துக்கு மதிப்புக்கொடுக்கும் இயல்பும் வளரும்”..

(9.9.1950 அன்று ரிஷிகேஷ் ரயில் நிலையத்தில் இருந்து யாத்திரையை துவங்கு முன்னர் சுவாமி சிவானந்தர் ஆற்றிய அருளுரை.)

(சிவானந்தம்-பரமானந்தம் தொடர்ந்து பிரவகிக்கும்)

குறிப்பு: இமய ஜோதி சுவாமி சிவானந்தரின் சொற்பொழிவுகளை இங்கே பகிர்ந்துகொள்ளும் இந் நல்வாய்ப்பினை எனக்குத் தந்து கொண்டிருக்கும் இறைவனைப் போற்றி பணிகிறேன். இந்த இழைக்கு சிவானந்தம்-பரமானந்தம் எனப் பொருத்தமாகப் பெயர் சூட்டிய இரத்தினமாலை குழும நிறுவனர்-இறையடியார் திரு.சங்கர்குமார் அவர்களை பணிந்து வணங்குகிறேன். எனது கவனக் குறைவின் காரணமாக தட்டச்சுப் பிழை ஏதேனும் பதிவில் ஏற்பட்டிருந்தால் அன்பர்கள் தயை கூர்ந்து சுட்டிக் காட்டினால் சரி செய்து விடுகிறேன். ஓம் சிவோஹம்.

'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

சுவாமி சிவானந்தா(ரிஷிகேஷ்)ஜியின் ''இமயம் முதல் இலங்கை வரை''

2011-07-23T23:14:00.000+05:30

இறை அடியார்களுக்கு என் பணிவான வணக்கங்கள்.

சுவாமி சிவானந்தா(ரிஷிகேஷ்)ஜியின் ''இமயம் முதல் இலங்கை வரை'' என்னும் அற்புத நூலை படிக்கும் வாய்ப்பு பெற்று இருக்கிறேன்.

9.9.1950 முதல் 8.11.1950 வரை சுவாமி சிவானந்தர் ரிஷிகேஷில் துவங்கி கொழும்பு வரை யாத்திரை செய்த போது நிகழ்த்திய ஆன்மீகப் பேருரைகள் இந்நூல் வடிவில் அழகு தமிழில் இராசிபுரம் தெய்வீக வாழ்க்கைச் சங்கம் வெளியிட்டிருக்கிறது.

எத்துணை முறை படித்தாலும் திகட்டாத ஆன்மீகப் பேரின்பத் தேன் சுவையை சுவாமி சிவானந்தர் இந்த உரைகளில் நமக்காக அளித்திருக்கிறார். அது இறைவனின் கருணை என்று அவரே கூறுகிறார்.

அறுபது ஆண்டுகள் கடந்த பின்னர் நாம் படிக்கும் போது இன்றைய காலகட்டத்தில் கூட இவை நமக்கு இன்றியமையாத ஆன்மீகக் கருத்துக்களை போதிக்கின்றன. இன்னும் பல நூறு ஆயிரம் ஆண்டுகளுக்கும் இந்த போதனைகள் நிலைபெறும் தன்மை வாய்ந்தன என்பதை கருத்தூன்றிப் படிக்கும் போது தெள்ளிதின் உணரலாம்.

இந்நூலில் இருந்து ஒரு சில பகுதிகளை இங்கே பதிவிட திருவருள் கூட்டி இருக்கிறது.

இதனைப் படிக்கும் இறையடியார்கள் சுவாமி சிவானந்தரின் பரமானந்தத் தேன்துளிகளை சுவைத்து இன்புறுவார்கள் என்று நம்புகிறேன்.

அனைத்து இறையடியார்களின் திருவடி பணிந்து வணங்குகிறேன்.

நூலின் துவக்கத்தில் வெளியான சுவாமி சிவானந்தரின் கவிதையை வெளியிட்டு அவர்தம் ஆசியுடன் இந்த இழையைத் துவங்குகிறேன்.

இமய ஜோதி சுவாமி சிவானந்த சரஸ்வதி.

உள்ளொலி.

உள்ளிருந் தொருகுரல்

உரைத்தது கேட்டேன் !

''தெள்ளிய அமுதைத்

தேனைத் தருவேன்.

அள்ளியே அதனை

அனைவர்க்கு மளிப்பாய்.

உள்ளத்தில் உறுதிஞானம்

உனக்கு நான் தருவேன் ! "

அந்த ஆணையை

அகத்தினில் கொண்டு

இந்த நாட்டிடை

எங்கும் சென்று

நொந்த மாந்தர்

நொடித்தொர்க் கெல்லாம்

தந்தேன் அமுதை,

தன்யன் ஆனேன்.

-சிவானந்தர்.

(பரமானந்தம் தொடர்ந்து பிரவகிக்கும்)

இந்த நல்வாய்ப்பினை ஏற்படுத்திக் கொடுத்திருக்கும் ஈசன் திருவருளை போற்றிப் பணிகிறேன்.

'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

அமரநாதம் - 2011 : பகுதி நான்கு. நிறைவுப் பகுதி.

2011-06-28T08:49:00.000+05:30

அமரநாதம் - தொடரும் சிவகணங்கள்

சிவனருள் பொலிந்தது... நலமே விளைந்தது.

குன்னூர் அன்பர்களின்

பத்தாவது அமர்நாத் யாத்திரை

வைபவங்கள்.

குன்னூரில் இருந்து அஷ்வின்ஜி வழங்கும் நேரடி ரிப்போர்ட்.

பகுதி நான்கு:

நிறைவுப் பகுதி.

பிளாஷ் செய்தி:

இந்தப் பகுதியை எழுதத் துவங்கிய இந்த நேரத்தில் (ஜூன் 25, 2011: 0800 Hrs.)

ஹரித்வாரில் இருந்து பவானி ரவி பேசினார். அவர்களது குழு இன்று காலை ஹரித்வார் அடைந்தது. பயணம் மிகவும் நல்லபடியாக அமைந்திருந்ததாகத் தெரிவித்தார். இன்று ஹரித்வாரில் உள்ள திருத்தலங்களை தரிசித்து விட்டு, இரவு ஹரித்வாரில் தங்கி, நாளைக் காலை ரிஷிகேஷ் செல்கிறார்கள். பின்னர் அங்கிருந்து கேதார்நாத், பத்ரிநாத் செல்கிறார்கள். பின்னர் ஹரித்வார் வந்து அங்கிருந்து ஜம்மு சென்று வைஷ்நோதேவி, அமர்நாத் செல்கிறார்கள். அதன் பின்னர் அலஹாபாத், காசி, கயா சென்று விட்டு சென்னை வந்து அதன் பின்னர் ராமேஸ்வரம் சென்று யாத்திரையை பூர்த்தி செய்கிறார்கள். ஒவ்வொரு திருத்தலத்தில் இருந்தும் என்னுடன் தொடர்பு கொள்வதாக கூறியிருக்கிறார். அந்த வகையில் ஹரித்வாரில் இருந்து இன்று என்னை குழுவினர் தொடர்பு கொண்டார்கள்.

வாருங்கள் மீண்டும் நாம் குன்னூர் செல்வோம்.

பவானி ரவியை வருந்த வைத்தது வேறொன்றும் இல்லை. குன்னூரில் உள்ள லாட்ஜ்கள் அனைத்தும் ஃபுல் ஆகி விட்டதால் அறைகள் கிடைக்கவில்லை என்பதே அந்த செய்தி.

பவானி ரவி வருந்தும் போது நான் மகிழ்ந்தேன். ஏனெனில் அவர்களுக்கு செலவு வைக்காமல் இறைவன் தடுத்தது தான் காரணம். மாறாக, எனக்கு வேறொரு எண்ணம தோன்றியது. குன்னூர் ரயில்வே ஸ்டேஷனை ஒட்டி ரயில்வே அதிகாரிகள் விருந்தினர் இல்லம் உள்ளது. முன்னமே அலுவலக ரீதியாக மனுச் செய்து ஒதுக்கீடு பெற்று வந்தால் அங்கு தங்கலாம். இப்போது சீசன் இல்லை என்பதினால் காலியாக தான் இருக்கும். எனவே ரவியை கவலைப் பட வேண்டாம் என்று சொல்லிவிட்டு, நான் சம்பந்தப்பட்ட அலுவலரை சந்திக்க சென்றேன். நான் நினைத்தது போலவே முன்பதிவுகள் எதுவும் இல்லாமல் ஒரு சூட் காலியாக இருந்தது. நான் வந்திருக்கும் விஷயத்தை அவரிடம் சொல்ல அவர் தாராளமாக குளித்துவிட்டு உடை மாற்றிக் கொள்ளுங்கள். உங்கள் பையை இங்கேயே வைத்துவிட்டு கோவிலுக்கு செல்லுங்கள். மாலை மேட்டுப்பாளையம் புறப்படும் சமயத்தில் வந்து பையை எடுத்துக் கொள்ளலாம் என்று அனுமதித்தார். அனுமதி தந்த அந்த அதிகாரியின் பெயர் அருணாசலம். ஆஹா! இங்கும் சிவனருள் பொழிகிறது என்பதை உணர்ந்து நான் மனமுருகி இறைவன் திருநாமம் சொல்லி வணங்கினேன்.

நாம் நல்லோருடன் இருக்கும் போது நமக்கு எல்லாமே நல்லதாகவே நடக்கும் என்பது இங்கும் நிரூபணமானது. எனது தங்கும் அறை விஷயம் ஒரு வழியாக தீர்வுக்கு வந்ததும் ரவியும் அவர் நண்பரும் நிம்மதியானார்கள். என்னை குளித்து விட்டு ரெடியாக இருக்க சொல்லி விட்டு கோவில் ஏற்பாடுகளை கவனித்து விட்டு வந்து கோவிலுக்கு என்னை அழைத்துச் செல்வதாக சொல்லி சென்றனர்.

பவானி ரவி அவர்களின் இல்லத்துக்கே என்னை அழைத்துச் சென்று இருந்திருக்கலாம். நான் குளிக்க மட்டும்தான் வேண்டி இருந்தது. ஆனால் அவருக்கோ இவர் சென்னையில் இருந்து வருபவர் ஆயிற்றே, வசதி க்குறைவாக எண்ணி விடுவாரோ என்று கவலை. நான் சென்னையில் இருந்து பேசும் போதே ரூம் எதுவும் போடவேண்டாம் என்று அவரிடம் கண்டிப்பாக கூறி இருந்தேன். சொல்லியும் கேட்காமல் அவர் நான் குன்னூரை அடைவதற்கு முன்னதாகவே அறை ஏற்பாடு செய்ய முயன்று இருந்திருக்கிறார். அந்த நேரத்தில் ரூம் கிடைக்காமல் போய் அவரது கவலைகள் அருணாசலத்தின் உதவியால் தீர்க்கப்பட்ட சந்தோஷத்தில் அவர்கள் கோவிலுக்கு சென்றனர்.

நான் அறைக்குச் சென்று சுடுநீரில் குளித்து உடைமாற்றி நீறு பூசி திருவாசகமும், கோளறு பதிகமும் வாசித்தேன்.

இறைவனின் புகழை ஓதி முடியும் தருவாயில் அன்பர்கள் வந்து என்னை அழைத்துச் சென்றனர். இந்த அமர்நாத் யாத்திரை குழுவில் உள்ள ஒவ்வொரு சிவனடியாரும் ஒவ்வொரு நாயன்மாரைப் போல சிவபெருமான் மேலும், சிவனடியார்கள் மேலும் மாறாக் காதல் கொண்டவர்களாக விளங்கினார்கள்.

அவர்களைப் பற்றி ஒவ்வொருவராக விவரிக்க முயன்றால் இந்த தொடர் நீளும் என்பதால் கோவில் வைபவங்களை பற்றி மட்டுமே நான் இந்த பகுதியில் சொல்லி விட்டு முடிக்க எண்ணி இருக்கிறேன். வாய்ப்பு இருப்பின் அவர்களைப் பற்றியும் வேறொரு சந்தர்ப்பத்தில் பார்க்கலாம்.

எனக்கு விருந்துபசாரம் செய்து விட வேண்டிய ஆர்வத்தில் அவர்கள் இருந்தார்கள். நானோ அபிஷேகம் முடிந்த பிறகு அன்னதானத்தில் சாப்பிடுகிறேன் அதுவரை உபவாசமாக இருக்கிறேன் என்று எவ்வளவோ மறுத்தும் கேட்காமல் ஒரு ஹோட்டலுக்கு அழைத்துச் சென்று காலை சிற்றுண்டி அருந்தச் சொல்லி என்னை நிர்பந்தித்ததின் பேரில் ஒரு பொங்கல் போதுமே என்று சொல்லியும் கேட்காமல், மேலும் ஒரு தோசை, பின்னர் காப்பி என அவர்கள் திருப்திக்காக சாப்பிட்டேன்.

பின்னர் கோவிலுக்கு சென்றோம். அங்கே ஈரோடில் இருந்து கயிலை ஈஸ்வரன் ஐயா வந்திருந்தார்கள். இவர்தான் ஆரம்பத்தில் பவானி ரவி அவர்களையும் அவரது நண்பர்களையும் அமர்நாத்துக்கு வழி நடத்தியவர். பெரியவர் கயிலை ஈஸ்வரன் ஐயாவுக்கு வயது 58 ஆகிறது. முன்னாள் ராணுவ வீரர். ஈரோட்டில் வியாபாரம் செய்கிறார். சிவனடியார்களுக்கு சேவை செய்வதை தனது வாழ்க்கை இலட்சியமாக கொண்டிருக்கிறார். கடந்த ஆண்டு கயிலை மானசரோவர யாத்திரையை நிறைவேற்றி கயிலைநாதனை கண்ணாரக் கண்டு வந்து சிவபூரணமாக இருக்கிறார்.

பவானி ரவி அவர்களது இந்த பத்தாவது ஆண்டு யாத்திரையை வாழ்த்தி வழியனுப்பவும், அபிஷேக ஆராதனைகளை துவங்கி வைத்து திருமுறைகளை ஓதி முறைப்படுத்தவும், அன்னதானத்தினை துவங்கி வைக்கவும் அவர்கள் இங்கே வந்து இருக்கிறார்கள். அன்பு மயமாக இருக்கும் அந்த கயிலை புனிதரை அறிமுகப் படுத்திய போது நான் அவரது திருவடி பணிந்த போது அவரும் பதிலுக்கு பணிந்தார். அந்த அளவுக்கு சிவ மயமாக இருந்தார்.

கோவிலுக்குள் சென்று எல்லாத் தெய்வங்களையும் வணங்கினோம். சிவாசாரியார் மகேஷைக் கண்டதும், ஆரத்தி முடித்து தட்டினை காட்ட வந்த போது அவர் பெயரைச் சொல்லி அழைத்ததும் ஆச்சரியத்தில் கண்களை விரித்தார். என்னை முன்னதாக பார்த்ததில்லை அவர். அந்த நிலையில் நான் அவரது பெயரைச் சொல்லி அழைத்தில் அவருக்கு வியப்பு தோன்றியது. நான் பிரதோஷ அன்பர் அரவங்காடு சிவனடியார் திரு.ஜோகராஜ் அவர்களின் பெயரைச் சொன்னபோது மேலும் வியந்தார். என்னைப் பொறுத்த வரையில் இந்தமுறை நான் எல்லாரையுமே முதல் முறையாகத் தான் சந்திக்கிறேன். ஆனால் பழகிய அனைவருமே பல ஜென்மங்களுக்கு முன்னரே பார்த்த மாதிரி பழகினார்கள். யாத்திரையில் இந்த முறை ஏழு பேர்கள் தான் போகிறார்கள் என்று கூறினார் பவானி ரவி.

அந்த குழுவில் உள்ளவர்கள் பவானி ரவி, அவரது அன்னை, ரவியின் மனைவி மற்றும் திரு 'புல்லட்' குமரேசன், குமரேசனின் மனைவி திருமதி ரேவதி, ரேவதியின் சகோதரி திருமதி கலாவதி மற்றும் இவர்களுடன் சிவா என்னும் ஒரு இளைஞர்.

முதலில் பதினைந்து பேர்கள் புறப்படுவதாக இருந்த போது இந்த நான்கு பெண்மணிகளும் அந்தக் குழுவில் இல்லை. மற்றவர்கள் சில காரணங்களால் வர இயலாத நிலை ஏற்பட்ட போது பத்தாவது முறையாக செல்லும் யாத்திரை தடைபட்டுவிடக் கூடாதே என்கிற எண்ணத்தில் திரு புல்லட் குமரேசனின் மனைவியும் அவரது சகோதரியும் யாத்திரை வர விரும்பி இருக்கிறார்கள். இதனைப் பார்த்த ரவியின் தாயாரும், மனைவியும் சேர்ந்து கொள்ள யாத்திரை குழு உருவாகி விட்டது.

திரு பவானி ரவியும், சிவா என்கிற இளைஞரும் ஏற்கனவே தொடர்ந்து அமர்நாத் யாத்திரை செல்பவர்கள். புல்லட் குமரேசனும் மற்ற நான்கு பெண்டிரும் இப்போது தான் முதல் முறையாக அமர்நாத் யாத்திரை செல்லுகிறார்கள்.

இந்த அறிமுகங்களை செய்து கொண்டிருந்த போது மகேஷ் சிவாசாரியார் சுவாமி அபிஷேகத்துக்கான ஏற்பாடுகளை செய்து கொண்டிருந்தார். எனது நண்பர் ஜிகேசுவாமியின் காமிராவை கொண்டு சென்று இருந்தேன். கடந்த அமர்நாத் பயணத்தின் போது மகன் ஹரீஷுடன் சுவாமி வந்திருந்தார். இந்த முறை கயிலாயகிரி செல்ல திட்டமிட்டு இறைவன் அனுமதி இல்லாததால் நாங்கள் பயணம் எதுவும் மேற்கொள்ளவில்லை. குன்னூர் அன்பர்கள் அமர்நாத் செல்லும் விஷயம் கேள்விப்பட்டதும் என் அலுவலக நண்பர்களைப் போலவே ஐவரும் அன்னதானத்துக்கு நன்கொடை தந்து தனது டிஜிடல் காமிராவையும் தந்து என்னை குன்னூர் அனுப்பினார்.

கடந்த அமர்நாத் பயண புகைப்படங்களை சிறந்த முறையில் அவரது காமிரா எடுத்து தந்தது. இந்த முறை அது என்னுடன் குன்னூர் வந்தது. தனது கடமையை செவ்வனே நிறைவற்றியது. அபிஷேக ஆராதனைகள் சிறப்பாக நடந்தேறியது. பின்னர் அன்னதானமும் மிகச் சிறப்பாக செய்விக்கப்பட்டது.

குன்னூர் வைபவ படங்களும், காணொளிக் காட்சிகளும் காண சொடுக்குக.

அடியார்கள் திருவமுது செய்ததும், இரண்டரை மணி அளவில் ''புல்லட்'' குமரேசன் வீட்டுக்கு என்னையும் கயிலை ஈஸ்வரனையும் அழைத்து சென்றார்கள்.

புல்லட் என்ற பெயர்க்காரணம் கேட்டேன். அவர் ஆட்டோமொபைல் மெக்கானிக்காக இருக்கிறார். புல்லட் பிரபலமாக இருந்த காலங்களில் அவர்தான் புல்லட் சர்வீஸ் செய்வாராம். அதனால் அவருக்கு அந்த பெயர் நிலைத்து விட்டது. பெரிய குடும்பம். அனவைரும் கூட்டுக் குடும்பமாக இருக்கிறார்கள். மூன்று மருமகள்கள், ஆறு பேரக் குழந்தைகள் மற்றும் குமரேசனின் தாய் என்று அந்த குடும்பம் நிறைவாழ்வு வாழ்ந்து கொன்று இருக்கிறது.

குமரேசனைப் போலவே அவரது மனைவி ரேவதி அவர்களும் முழு ஆன்மீகத்தில் திளைத்திருக்கிறார்கள். ரேவதியின் சகோதரி கலாவதி அருமையாக பக்திப் பாடல்களை பாடுகிறார். அக்கம்பக்கத்தில் உள்ள கோவில்களுக்கு சென்று கோவிலை சுத்தப் படுத்துதல், அன்னதானத்தின் போது காய்கறிகளை நறுக்குதல், பாத்திரங்களை கழுவித் தருதல் என்று வசதி படைத்த வாழ்க்கையில் இருந்தாலும் ஈஸ்வர சேவைகளில் தம்மை ஆத்மார்த்தமாக ஈடுபடுத்திக் கொள்கிறார்கள்.

ஆணவம் குறைய இந்த சேவைகள் பயன்படுவதாக மகிழ்ந்து சொல்லிக் கொள்ளுகிறார்கள். குமரேசனும் அவர்களது எல்லா சேவைகளிலும் தம்மையும் அர்ப்பணித்துக் கொள்ளுகிறார்.

அவரது இல்லத்தில் உள்ள அனைவரும் எங்களை பணிந்து வணங்கி ஆசி பெற்றதும், யாத்திரையின் போது பின்பற்ற வேண்டிய குறிப்புகளை கயிலை ஈஸ்வரனும் நானும் அவர்களுக்கு சொன்னோம். அரவங்காடு ஜோகராஜ் அவர்கள் என்னை போனில் தொடர்பு கொண்டு நான் வந்த நோக்கம் அனைத்தும் நலமாய் ஈடேறியது குறித்து கேட்டு மனமகிழ்ந்தார். நான் சென்னை திரும்பியதும் (அதாவது வியாழன்) காலையில் ஜோகராஜ் என்னுடன் பேசினார். ஞாயிறு அன்று சென்னை வருகிறார். அவரை எனது இல்லத்துக்கு அழைத்திருக்கிறேன். அவர் கேட்டிருந்த உதவியையும் அவர் வந்ததும் செய்ய உறுதி கூறி இருக்கிறேன்.

குமரேசன் அவர்களின் வீட்டில் இருந்து புறப்பட்டு கோவிலுக்கு சென்றோம். நான் கெஸ்ட் ஹவுஸுக்கு சென்று எனது உடைகளை மாற்றி பையை எடுத்துக் கொண்டு நான்கு மணி அளவில் மீண்டும் கோவிலுக்கு வந்து யாத்திரை குழுவினர் ஏற்பாடு செய்திருந்த டாடா சுமோவில் பயணித்து சுமார் ஆறரை மணி அளவில் மேட்டுப் பாளையம் ரயில்வே நிலையம் சென்று சேர்ந்தோம்.

அந்து மாலை ஏழு நாற்பத்தைந்து மணி அளவில் சென்னைக்கு புறப்படும் நீலகிரி எக்ஸ்ப்ரசில் சென்னை நோக்கி பயணித்தோம்.

எங்கள் எல்லோருக்கும் ஆசி கூறி ஈரோட்டில் கயிலை ஈஸ்வரன் இறங்கி கொண்டார்.

இந்த முறை குன்னூர் பயணம் எனக்கு முற்றிலும் புதிய உறவுகளை ஏற்படுத்தி தந்தது. இறைவன் போட்டிருக்கும் முடிச்சுக்கள் எந்த வகையானவை என்பதினை உணரும் போது எனக்கும் மகிழ்ச்சியாக இருந்தது.

வியாழன் அன்று அதிகாலை சென்னை வந்து சேர்ந்ததும் எனது நண்பர் திரு.ராஜூ அவர்கள் என்னையும் யாத்திரைக் குழுவினரையும் சென்னை சென்ட்ரலில் வரவேற்றார். குழுவினர் காலைக் கடன்களை முடித்ததும் அவர்களுக்குக் காலைச் சிற்றுண்டி வழங்கும் செலவினை நண்பர் ராஜூ அன்புடன் ஏற்றுக் கொண்டார்.

காலை ஒன்பது நாற்பதுக்கு புறப்படும் டேராடூன் எக்ஸ்ப்ரசில் அவர்களை வழியனுப்பி விட்டு பிரிய மனமின்றி இல்லம் வந்தேன்.

யாத்திரை குழுவினர் நீண்ட பயணம் மேற்கொண்டு சென்னைக்கு திரும்பும் சமயத்தில் அவர்களை வரவேற்று மதிய உணவு ஏற்பாடு செய்து அவர்களை அமுது செய்வித்த பின்னர் ராமேஸ்வரம் செல்லும் ரயிலில் வழியனுப்ப சித்தமாய் ஆவலுடன் காத்திருக்கிறேன்.

எனது இந்த அனுபவங்களைப் பகிர்ந்து கொள்ள ஒரு வாய்ப்பினை ஏற்படுத்தி தந்திருக்கும் என் சிவனை பணிந்து வணங்குகிறேன். ஆர்வத்துடன் படித்து ரசித்து வரும் இறையடியார்களை திருவடி பணிந்து வணங்கி எனது இதய நன்றியை காணிக்கையாக்குகிறேன்.

ஆங்காங்கே சில சொற்பிழைகள் ஏற்பட்டிருக்கலாம். பிழை பொறுத்து அருள உங்களை பணிந்து வேண்டி கேட்டுக் கொள்கிறேன்.

இந்த முறை குன்னூர் சென்று வந்த பின்னர் மூன்று மாதங்களாக தடைப் பட்டிருந்த சில வேலைகள் வெற்றிகரமாக நடந்தேறின என்ற பெரும் மகிழ்வு தரும் செய்தியை தங்களுடன் பகிர்ந்து கொள்கிறேன். எனது இரண்டாவது மகன் வெள்ளிக்கிழமை நேற்று எம்காமில் அட்மிஷன் ஆனார்.

எத்துணை முறை சொல்லியும் எனது வண்டியை சர்வீசுக்கு கொண்டு செல்லாமல் காலம் கடத்திய மெக்கானிக் நான் இல்லாத சமயத்தில் எனது இல்லம் தேடி வந்து என் மனைவியிடம் மன்னிப்பு கேட்டுக் கொண்டு வண்டியை எடுத்துச் சென்றார்.

இப்படி பல விஷயங்கள். படிப்பதற்கு சுவாரஸ்யமான சிலவற்றை மட்டுமே பகிர்ந்திருக்கிறேன்.

இறையவன் இன்னருளால், எந்நாளும் சிவனருள் பொழிந்து, மனசெல்லாம் நிறைந்து எல்லாம் சிவக் கணங்களாக விளங்குகின்றன.

இந்த தொடரை எல்லாம் வல்ல சிவனுக்கு அர்ப்பணித்து நிறைவு செய்கிறேன்.

ஓம் சிவோஹம்.

'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

அமரநாதம் - 2011 : பகுதி மூன்று

2011-06-26T09:40:00.000+05:30

அமரநாதம் - தொடரும் சிவகணங்கள்

சிவனருள் பொலிந்தது... நலமே விளைந்தது.

குன்னூர் அன்பர்களின்

பத்தாவது அமர்நாத் யாத்திரை

வைபவங்கள்.

குன்னூரில் இருந்து அஷ்வின்ஜி வழங்கும் நேரடி ரிப்போர்ட்.

பகுதி மூன்று.

காலையில் மேட்டுப்பாளையத்தில் இறங்கி பஸ்ஸ்டாண்டை நோக்கி நடந்தேன். கடந்த முப்பத்தொரு வருடங்களாக ஊட்டி, குன்னூர், கோத்தகிரி என்று பல சமயங்களில் இங்கே வந்திருக்கிறேன். அனைத்துமே இன்பச் செலவாகவே இருந்தது. ஆன்மீகக் காரணத்துக்காக நீலகிரி வருவது இதுவே முதல் முறை.

குன்னூர் சிவனடியார் பவானி ரவி அவர்களை மொபைலில் அழைத்தேன். நான் மேட்டுப்பாளையத்துக்கு வந்து விட்டதை அவரிடம் உறுதி செய்தேன். மேட்டுப்பாளையத்துக்கு வந்து அழைத்துச் செல்லவா என்றார். நான் வேண்டாம் நீங்கள் உங்கள் பணிகளை தொடருங்கள். நான் குன்னூர் வந்து விடுகிறேன் என்றேன்.

மேட்டுப்பாளையம் பேருந்து நிலையம் இரயில்வே நிலையத்தில் இருந்து வெகு அருகாமையில் இருக்கிறது. ஐந்து நிமிட நடை போதும். ஆனால் டூரிஸ்ட் டாக்சிகாரர்கள் பஸ் நிலையம் சென்று சேர்வதற்குள் நம்மை மொய்த்துக் கொள்கிறார்கள், நான் அவர்களை நாசூக்காக தவிர்த்து விட்டு பஸ் ஸ்டாண்டுக்கு  சென்றேன். மேட்டுப்பாளயம்-ஊட்டி பஸ்கள் வரிசையாக நின்றுகொண்டிருந்தன. ஒரு பஸ்ஸில் அமர இடம் இல்லை என்பதால் அடுத்த பஸ்ஸில் ஏறினேன். அதிலும் பயணிகள் அமர்ந்திருந்தார்கள். முன்புறம் படிக்கட்டுக்கு பக்கமாக டிரைவர் இருக்கைக்கு இடது புறமாக இருவர் அமரும் இருக்கையில் ஒருவர் அமர்வதற்காக துண்டு போட்டிருக்க காலி இடத்தில் நான் அமர்ந்தேன்.

எனக்கு முன் இருக்கையில் ஒரு அன்பர் அமர்ந்திருந்தார். நீலகிரிக்காரார் என்பது அவரது பாவனைகளில் இருந்தே தெரிந்தது. துண்டு போட்டிருக்கிறதே இந்த சீட்டுக்கு யாராவது வருகிறார்களா என்று அவரிடம் விசாரித்தேன். அவரோ 'தெரியலை நீங்க உக்காருங்க. யாராவது வந்தா பாத்துக்கலாம்' என்று ஆதரவாக பேசினார். அவருக்கு சுமார் ஐம்பத்தெட்டு வயது இருக்கலாம். மலைவாசஸ்தலங்களில் வாழ்பவர்களுக்கு தொப்பை இருப்பதில்லை. ஏனெனில் பெரும்பாலும் அவர்கள் நடந்தே பல இடங்களுக்கு செல்லும் வழக்கம் உடையவர்களாக இருப்பார்கள். மேலே, கீழே இதுதான் அவர்களது திசைகள்.

அந்த அன்பர் என்னைப் பார்த்து அன்பாக சிரித்தார். நானும் சஹஜ நிலைமைக்குத் திரும்பினேன். பஸ்ஸில் PP என்று போட்டிருக்கே. குன்னூரில் நிற்குமா? என்று அவரிடம் பேச்சைத் துவங்கினேன். அவர் இதற்கெனவே காத்திருந்த மாதிரி ''ஓ. கட்டாயம் நிக்கும். நீங்க எங்கிருந்து வறீங்க?' என்று கேட்டார். நான் குன்னூர் செல்லும் காரணத்தை அவரிடம் தெரிவித்தேன். ''ஓ. சிவசுப்ரமணிய சுவாமி கோவிலுக்கா போகிறீர்கள் ? ஒவ்வொரு பிரதோஷத்தின் போதும் நான் அங்கே செல்வது வழக்கம்'' என்றார் மகிழ்ச்சியுடன்.

''ஆஹா! சத்சங்கம் துவங்கி விட்டது" என்று மனம் உவகையில் துள்ளியது.

அவரை நோக்கி என் கையை நீட்டி என் பெயர் சொல்லி அறிமுகப்படுத்திக் கொண்டேன். ஜோகராஜ் என்று தம்மை அறிமுகப்படுத்திக் கொண்ட அவர் அரவங்காடு வெடிமருந்து தொழிற்சாலையில் பணிபுரிவதாக சொன்னார்.

குன்னூர் திருக்கோவிலின் சிவாச்சாரியார்கள் மகேஷ் மற்றும் திருஞானசம்பந்தம் இருவரையும் நன்றாகத் தெரியும் என்று சொன்னவர் அவர்களை சந்தித்தால் அரவங்காடு ஜோகராஜ் என்று என் பெயரைச் சொல்லுங்கள் என்றார். ஓ. நிச்சயமாக என்றேன். ஜோகராஜ் படுகர் இனத்தை சேர்ந்தவர். நான் யாரிடமும் இனம், மொழி, மதம் பற்றிக் கேட்பதில்லை. அவராகவே சொன்னது. நீலகிரி மலைவாழ் மக்கள் கள்ளம கபடு இல்லாதவர்கள். அரவங்காடு வெடிமருந்து தொழிற்சாலையில் இருந்து ஐந்து கி.மீ தொலைவில் அவரது சொந்த ஊர் இருக்கிறதாம். இரண்டு ஏக்கர் தேயிலை தோட்டம் இருக்கிறதாம். மனைவி தோட்டத்தை நிர்வகிப்பதாகவும், விடுமுறை நாட்களில் அவரும் சென்று தோட்டத்தை பார்த்துக் கொள்வதாகவும் கூறினார். அவர் தற்சமயம் பாக்டரி குவார்டர்சில் குடியிருக்கிறதாக கூறினார். அவரது மகள்கள் இருவரில் ஒருவர் சென்னையில் பணிபுரிவதாகவும் இப்போது தான் சென்னைக்கு சென்று வேலையில் அமர்த்தி விட்டு வருவதாகவும் சொன்னார். அம்பத்தூரில் ஒரு ஐ.டி. நிறுவனத்தில் பணிக்கு முன்பான நாற்பத்தைந்து நாள் பயிற்சியில் சேர்ந்திருக்கிறார் ஜோகராஜின் மூத்த மகள். இரண்டாவது மகள் ஐந்தாவது வகுப்பில் படிப்பதாக சொன்னார். முதல் மகளுக்கும், இரண்டாவது மகளுக்கும் இடையே நீண்ண்ட இடைவெளி ஏற்பட்டு விட்டதாக வெட்கத்துடன் சொன்னார். அமர்நாத் யாத்திரையை குன்னூர் அன்பர்கள் பத்தாவது முறையாக துவங்க இருப்பது அவருக்கு புதிய செய்தியாக இருந்தது. அமர்நாத் பற்றி மிகவும் ஆர்வத்துடன் கேட்டார். கடந்த ஆண்டு நான் சென்று வந்த பயணம் பற்றி விவரமாக கேட்டார்.

நான் வேதாந்த வைபவம் வலைப்பதிவு முகவரியை தந்து எனது அமர்நாத் வைஷ்நோதேவி பயணக் கட்டுரையை படிக்கும்படி கூறினேன். அமர்நாத் பற்றி அறிந்துகொள்ளும் ஆர்வம அவருக்கு கரை கடந்து இருந்தது. நீலகிரி மக்களுக்கு இமகிரி மேல் காதல் இருப்பது இயற்கைதான். இமயத்தை இந்திரநீலபர்ப்பதம் என்கிறார் அப்பர் சுவாமிகள்.

நாங்கள் நீண்ட நாட்கள் பழகியவர் போல பேசிக் கொண்டிருக்கையில் பஸ்சில் கண்டக்டரும், டிரைவரும் ஏறிவிட்டார்கள். பஸ் கொஞ்ச நேரத்தில் புறப்படப் போகிறது என்றார் ஜோகராஜ்.

என் பக்கத்தில் இருந்த இருக்கையில் இட்டிருந்த துண்டு பஸ் டிரைவருடையதாம். துண்டை எடுத்துத் தரச் சொல்லி என்னிடம் கேட்டு வாங்கிக் கொண்டார் அந்த டிரைவர்.

என்ன அதிசயம் ? நான் பஸ்சில் ஏறி அமர இடம் போட்டு வைத்திருக்கிறதும், பக்கத்தில் அமர்ந்திருப்பவர் ஒரு சிவநேசர் என்பதும் எவ்வளவு அருமையான நிகழ்வு என்று? இதனையெல்லாம் இறையருள் நிகழ்த்தி இருக்கிறதே என்று நன்றியுடன் வியந்தேன்.

சிவநேசர் ஜோகராஜ் நான் குன்னூர் சென்று இறங்குவதற்குள், குன்னூர் பஸ் ஸ்டாண்டில் இருந்து கோவிலுக்கு எப்படிச் செல்வது என்ற வழியை விவரமாக பலமுறை கூறிவிட்டார். எனது செல் நம்பரை வாங்கிக் கொண்ட அவர் தனது செல் நம்பரையும் கொடுத்தார். ''வாங்க அரவங்காட்டில் இறங்கி வீட்டுக்கு வந்து குளித்து, டிபன் சாப்பிட்டுவிட்டு அப்புறமாக குன்னூர் செல்லலாம்'' என்று அன்புடன் என்னை அழைக்க, நான் அடுத்த முறை வரும் போது அவசியம் அவரது இல்லத்துக்கு வருவதாக உறுதி கூறினேன்.

மேட்டுப்பாளையத்தில் இருந்து குன்னூர் செல்ல பதின்மூன்று ரூபாய் கொடுத்து டிக்கெட் வாங்கினேன். குன்னூர் பஸ் நிறுத்தத்தில் இறங்குவதற்கு முன்னர் ஜோகராஜிடம் பிரியாவிடை பெற்றேன். திரு.ஜோகராஜின்  அறிமுகம் இறைவனின் பெரிய திட்டத்தின் ஒரு அங்கம் என்பது அவரிடம் பேசிக் கொண்டு வரும்போது எனக்குத் தெரிந்தது. சிவனடியாரின் தேவைகளை நிறைவேற்றுவதில் சிவனுக்கு உள்ள அக்கறை வேறு யாருக்கு வரும்? ஜோகராஜ் விஷயத்துக்கு அப்புறம் வருவோம். பயணித்த நேரம் சென்றதே தெரியாமல் காலை சுமார் எட்டு மணி அளவில் குன்னூரில் இறங்கினேன். சென்னை வெய்யிலின் தாக்கத்தில் தளர்ந்திருந்த உடலும் சூடான உள்ளமும், நீலகிரி மலையின் குளிர்காற்றில் புத்துணர்வு பெற்றன.

என்னை வரவேற்க காத்திருப்பதாக சொன்ன அன்பர் எவரையும் காணவில்லை. பஸ்ஸ்டாண்டில் நிற்பவர்கள் யாரும் என்னை கண்டு கொள்ளவில்லை. பவானி ரவி எங்கே போனார்? காத்திருப்பதாக கூறினாரே? என்று கவலையுடன் தேடிய என் கையறு நிலையைக் கண்ட திரு.ஜோகராஜ் கிட்டத்தட்ட பஸ்சில் இருந்து இறங்கிவிட்டார் என்றே சொல்லலாம். என்னை வரவேற்க யாரும் பஸ் நிறுத்தத்துக்கு வரவில்லை என்பது அவருக்கு புரிந்து விட்டது. ''பஸ்ச்சுக்குள்ளார வாங்க நாம்ப இப்போ அரவங்காடு போயிடலாம்'' என்று என்னை அழைத்தார்.

நான் அவரது பயணத்தை தொடரும்படி வேண்டிக் கொண்டு நன்றி கூறி அவரை அனுப்பினேன். பஸ்சில் இருந்து குழந்தை போல எட்டிப் பார்த்துக் கொண்டே என்னை நோக்கி கையசைத்து கொண்டிருந்தார் ஜோகராஜ். அடுத்த வளைவில் பஸ் என்பார்வையில் இருந்து மறைந்தது. ஆனால் உள்ளத்தில் இருந்து ஜோகராஜின் நினைவுகள் மறையவில்லை.

எனது பஸ் பயணத்திலும் ஒரு சிவநேசரை உடன் அனுப்பிவைத்த சிவனின் பேரன்பை எண்ணி வியந்தேன். திரு.ஜோகராஜூக்கு ஒரு தேவை இருக்கிறது. சென்னை சென்றவுடன் அதனை நிறைவேற்ற வேண்டும். அவருக்கு என்னை அறிமுகப்படுத்தியதும் இறைவனின் திருவுள்ளக் கிடக்கைதான்.

அங்கேயே கொஞ்ச நேரம் நின்று பார்த்து விட்டு பின்னர் கோவிலுக்கு செல்வது என்று எண்ணினேன். ஐந்து நிமிடங்கள் கழித்து சாலையை கடந்து கோவிலை நோக்கி நடந்தேன். ஜோகராஜ் விளக்கிய வழி கண் முன்னே விரிய நான் முன்னே நடந்தேன். சாலை சந்திப்பில் கடந்து மணிக்கூண்டு அருகே செல்கையில் எதிரே காவி வேட்டி, வெள்ளை சட்டை, காவித் துண்டு, நெற்றி முழுதும் திருநீறு பூசிய ஒருவர் (பவானி ரவி) டென்ஷனுடன் எதிரே வந்து கொண்டிருந்தார். கடந்த ஆண்டு அவரை ஒரு முறை பால்டால் முகாமில் பார்த்தது நினைவில் இருந்தது. ஆனால் . முகம் நினைவில் இல்லை. உள்ளுணர்வு உந்த ''ரவி சார்'' என்று கையை தூக்கி அவரை அழைத்தேன். அவர் அந்த நடு ரோட்டில் ''வாங்க சாமி'' என்று கூவிக் கொண்டே நெடுஞ்சாண் கிடையாக கீழே விழுந்து வணங்க நானும் பதிலுக்கு அவரை பணிந்தேன்.

''சிவசிவ என்ன இது பத்தாவது முறையாக அமர்நாத் போகிறீர்கள் நீங்கள் போய் என் காலில் விழுந்து கொண்டு?'' என்று அன்புடன் அவரை கண்டித்தேன். ரவி என்னை கடந்த ஆண்டு பால்டால் முகாமில் பார்த்து என்னுடன் புகைப்படம் எடுத்துக் கொண்டார்.

அச்சமயம் நான் குரங்குக் குல்லாய் போட்டிருந்ததால் என் முகம் அவருக்கு தெரியவில்லை. என்னை பஸ் ஸ்டாண்டில் காக்க வைத்தமைக்கு மன்னிப்பு கோரினார். ''வாங்க ரூம் போட்டுடலாம்'' என்று என் பையை பிடுங்கிக் கொண்டார்.

நான் ''ரவி சார். ரூம் எதுவும் போட வேண்டாம் என்றேன். இன்று பிற்பகல் நாலு மணிக்கெல்லாம் கீழே இறங்கி விடப் போகிறோம். அது மட்டுமின்றி கோவையில் இருந்து மேட்டுப்பாளையம் வருவதற்குள் ரயிலியேயே காலைக் கடன்களை நான் முடித்து விட்டேன்'' என்று கூறினேன்.

''இப்போது குளிக்க வேண்டியது மட்டும் தான் பாக்கி. ஏதேனும் ஒரு அன்பர் இல்லத்தில் குளித்து விட்டு கோவிலுக்கு போயிடலாம்'' என்றேன்.

அவர் இசைவதாக தெரியவில்லை. இந்நிலையில் எனக்காக ஏற்கனவே ரூம் போட போன ஒருவர் ஓடி வந்து என்னையும் வணங்கி ரவியின் காதில் பரபரப்புடன் ரகசியமாக ஏதோ சொல்ல இரவியின் முகம் மாறி கவலை கொண்டதைக் கண்டேன்.

(சிந்தையை குளிர்விக்கும் சிவகணங்கள் தொடரும்..)

--
   'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

அமரநாதம் - 2011 : பகுதி இரண்டு

2011-06-24T19:38:00.000+05:30

அமரநாதம் - தொடரும் சிவகணங்கள்

சிவனருள் பொலிந்தது... நலமே விளைந்தது.

குன்னூர் அன்பர்களின்

பத்தாவது அமர்நாத் யாத்திரை

வைபவங்கள்.

குன்னூரில் இருந்து அஷ்வின்ஜி வழங்கும் நேரடி ரிப்போர்ட்.

குழும இறையடியார்களுக்கு என் பணிவன்பான வணக்கங்கள்.

கடந்த பதிவில் குன்னூர் சிவனடியார்கள் நிகழ்த்தும் பத்தாவது அமர்நாத் யாத்திரை பற்றியும், புறப்படுவதகு முன்னதாக சிவனுக்கு அவர்கள் செய்த அபிஷேக பூஜைகள், மற்றும் அன்னதானம் பற்றி குறிப்பிட்டிருந்தேன். பவானி ரவி (குன்னூர்) அவர்கள் பலமுறை என்னை இந்த வைபவங்களில் கலந்து கொள்ள வரச் சொல்லி அன்புக் கட்டளை இட்டுவிட நானும் இந்த முறை நம்மால் அமர்நாத் போக இயலவில்லை. சிவனடியார்கள் நிகழ்த்தும் இந்த வைபவங்களில் கலந்து கொண்டு சிவனருள் பெறலாமே என்று புறப்பட ஏற்பாடு செய்தேன்.

ஜூன் ஒன்றாம் தேதி அன்றே ஜூன் இருபத்தோராம் தேதி பயணத்துக்கு நீலகிரி எக்ஸ்ப்ரசில் முன்பதிவு செய்யச் சென்றேன். காத்திருப்போர் பட்டியல் எண் ஐந்து எனனை பார்த்து சிரித்தது.

திரும்பி வருவதற்கு இருபத்தி இரண்டாம் தேதி மேட்டுப்பாளையத்தில் இருந்து புறப்படும் நீலகிரி எக்ஸ்ப்ரசிலும் இதே பிரச்சினை தான்.

எனினும், நான் பரவாயில்லை என்று சொல்லி விட்டு பயண டிக்கட்டுகளை வாங்கிக் கொண்டேன். இறையருள் வேண்டி நின்ற எனக்கு புறப்படும் நாளான இருபத்தோராம் தேதி அன்று வெயிட் லிஸ்ட் கிளியர் ஆகி தானாகவே கன்ஃபர்ம் ஆகி இருந்தது. இறைவனின் திருவருளால் இது ஆயிற்று என்று எண்ணி மனமிக மகிழ்ந்து சிவனுக்கு நன்றி பாராட்டினேன்.

அது என்னவோ தெரியவில்லை. தற்போதெல்லாம் சத் சங்கங்கள் வெகு சாதாரணமாக வாய்க்கின்றன .அதுவும் இறையருளின்றி நடக்காது அல்லவா?

ரயில் நிலையம் சென்றதும் நான் எனது பெட்டி எண்ணையும், படுக்கை எண்ணையும் ஊர்ஜிதம் செய்து கொண்டு பெட்டிக்கு சென்றேன். எனக்கு எதிரே ஒரு சுவாமிஜி அமர்ந்திருந்தார். நல்ல உயரம், ஆஜானுபாகுவாக இருந்தார். தொப்பை எதுவும் இல்லை. முகம் அதிதேஜஸாக இருந்தது. அவருக்கு நமஸ்காரம் சொல்லிவிட்டு அவர் எதிரில் அமர்ந்தேன். உதகையில் உள்ள ஸ்ரீநாராயண குருகுல ஆஷ்ரமத்தின் சீனியர் ஸ்வாமிகளில் அவரும் ஒருவர். ரயில் புறப்படும் வரை சுவாரசியமான ஆன்மீக விஷயங்களை நிறைய என்னுடன் பகிர்ந்து கொண்டார். நான் என்னைப் பற்றி அவருக்கு அறிமுகம் செய்து கொண்டேன். அவரது பூர்வீகம் கல்கத்தா ஆனால் பிறந்து வளர்ந்தது எல்லாம் ஊட்டி தான் என்றார். ஆங்கில மீடிய பள்ளிகளில் படித்ததினால் தமிழ் பேச வராது. ஆனால் யாராவது பேசினால் தமக்கு நன்றாக புரியும் என்கிறார். அப்போது நான் ஸ்ரீநாராயண குரு எவ்வாறு தமிழ், ஆங்கிலம், மலையாளம், சமஸ்கிருத மொழிகளில் புலமை பெற்றிருந்தார் என்பதையும் தமிழில் அவர் எழுதிய பாடல்களைப் பற்றியும் அவரிடம் பேசிக் கொண்டிருந்தேன். வள்ளலார் பற்றிய நாராயண குருவின் பார்வைகளை சுவாமிஜி மிகவும் ச்லாகித்து பேசினார். ''வாடிய பயிரைக் கண்டபோதெல்லாம் வாடினேன்'' என்னும் பிற உயிரை தன உயிர் போல நேசிக்கும் பாடலை தமிழில் சொல்லி அவருக்கு விளக்கிய போது மிகவும் மகிழ்ந்தார். இவ்வாறாக அருமையான சத் சங்கத்துடன் எனது குன்னூர் பயணம் துவங்கியது. வடநாட்டுப் பக்கம் தொடர் பயணங்கள் முடித்து வரும் சுவாமிஜிக்கு ஓய்வு தேவை என்பதால் அவரிடம் ஆசி பெற்றுக் கொண்டு அவருக்கு படுக்க இடம் கொடுத்து விட்டு மேல் பெர்த்துக்கு சென்றேன். ஒன்பதரை மணியளவில் உறங்கச் சென்றேன். நல்லதொரு சத்சங்கத்தினை தந்த சிவனுக்கு நன்றி கூறி ஆராதித்து விட்டு படுத்தேன். அதிகாலை மேட்டுப்பாளையம் செல்லும் வரை நல்ல உறக்கத்தில் ஆழ்ந்தேன். காலை சுமார் ஆறு மணி அளவில் மேட்டுப்பாளையம் சென்று சேர்ந்தேன்.

(தொடரும்)

அமரநாதம் - 2011 - பகுதி ஒன்று

2011-06-24T08:48:00.000+05:30

அமர்நாத் - தொடரும் சிவகணங்கள்....

ஓம் நமசிவாய..

கடந்த ஆண்டு வைஷ்ணோதேவி, அமர்நாத் திருத்தல யாத்திரை போய் வந்த பிறகு இங்கே நான் பதிவிட்ட அனுபவங்களை தொடர்ந்து படித்து பாராட்டிய இறையடியார்களுக்கு பணிவான வணக்கங்கள்.

கடந்த ஆண்டு (2010) அமர்நாத் யாத்திரை செல்வதற்காக பால்டால் அடிவார முகாமில் தங்கியிருந்த போது குன்னூர், ஈரோடு, கோவை பகுதிகளைச் சேர்ந்த பதினைந்து அன்பர்களை சந்தித்தேன். இருபத்தைந்து முதல் முப்பந்தைந்து வயது கொண்ட துடிப்பான சிவனடியார்களான அவர்கள் ஒன்பதாவது முறையாக அந்த சமயம் அமர்நாத்துக்கு தொடர் யாத்திரையாக வந்திருந்தார்கள். பவானி இரவி என்னும் அன்பர் (நீலகிரி-கூனூரை சேர்ந்தவர்) அவர்களை வழிநடத்தி வந்திருந்தார். அவர்களது அன்பும், ஆர்வமும், துடிப்பும் என்னை மிகவும் கவர்ந்தது. அவர்களுடன் அளவளாவிய சமயம் அவரது முகவரி செல்பேசி எண்ணைக கேட்டு வாங்கினேன். ஆனால் மிகச் சிறிய துண்டு காகிதத்தில் எழுதி வாங்கியதால் சென்னை வந்த பின்னர் என்னால் அதனைக் கண்டு பிடிக்க இயலாமல் போய் விட்டது.

எனது முகவரியையும் அவர்கள் பெற்றுக் கொள்ளவில்லை. அவர்களால் என்னையோ அல்லது நான் அவர்களையோ தொடர்பு கொள்ள முடியாமல் போய்விட்டது. இதனை ஒரு துர்பாக்கியமாகவே கருதினேன்.

தொடர்பு கிட்டாமல் போனதால் அவர்களோடு சேர்ந்து எடுத்துக் கொண்ட புகைப்படங்கள் கிடைக்காமல் போனது. அதனால் அவர்களைச் சந்தித்த அந்த இனிய கணங்களை எனது யாத்திரை பயண அனுபவத் தொடரில் குறிப்பிட இயலாமல் போய்விட்டது.

ஆனால் கடந்த மே மாதம் முதல் வாரத்தில் வேறு ஏதோ புத்தகத்தை தேட எதை எதையோ குடைந்த போது சிறிய துண்டுக் காகிதம் கண்ணில் தென்பட பவானி இரவி (அமர்நாத் பாத யாத்திரைக் குழு) என்ற அந்தப் பெயர் என் நினைவுப் பகுதியை தூண்டி விட ''ஆஹா. கிடைத்து விட்டதே என மகிழ்ந்து பவானி இரவியை செல்பேசி மூலமாக தொடர்பு கொண்டு பேசினேன்.''

கிட்டத்தட்ட 340 நாட்கள் கழித்து பேசியும் இரவி என்னை நினைவில் வைத்திருந்தார். இரண்டு மாதங்கள் முன்புதான் அந்த அணியினர் நேபாளம் சென்று பசுபதிநாதரையும், முக்தினாதரையும் தரிசனம் செய்து விட்டு வந்ததை தெரிவித்தார்.

இந்த ஆண்டு பத்தாவது முறையாக அவர்கள் ஜூன் இருபத்து மூன்றாம் தேதி அன்று சென்னையில் இருந்து டெல்லி செல்லும் தமிழ்நாடு எக்ஸ்ப்ரசில் பதிவு செய்திருந்த செய்தியைத் தெரிவித்தார். என்னையும் அவர்களுடன் கலந்து கொள்ள அழைத்தார். ஜூன் இருபது (அதாவது நான் பதிவிடும் இந்த நாள்) வரை எனது எம்.எஸ்சி. (யோகா) தீசிஸ் சப்மிஷன், வைவா போன்ற கமிட்மெண்ட்கள் இருப்பதினால் என்னால் அவர்களுடன் யாத்திரையில் கலந்து கொள்ள இயலாமல் இருப்பதினை அவருக்கு தெரிவித்தேன். அ(சி)வன் அழைக்காமல் எப்படி செல்லமுடியும்?

இருப்பினும் பவானி இரவி என்னை இருபத்தி இரண்டாம் தேதி அன்று குன்னூரில் உள்ள சிவன் கோவிலில் சிவனுக்கு நடைபெறும் அபிஷேகம் மற்றும் பூஜை மற்றும் அதற்கு பின்னர் நிகழ உள்ள அன்னதான நிகழ்ச்சிகளில் கலந்து கொள்ள என்னை அழைத்தார். அதனை சிவனின் அழைப்பாக ஏற்றுக் கொண்டு உடனே நீலகிரி விரைவு ரயிலில் 21-ந்தேதி அன்று இரவு முன் பதிவு செய்தேன்.

மூன்று வாரங்களுக்கு முன்பு அவர் எனக்கு அனுப்பியிருந்த அழைப்பிதழில் என் பெயரை அன்னதான வைபவத்தை துவங்கி வைப்பவர்கள் பட்டியலில் வெளியிட்டிருந்தார். எனது பெயரை குறிப்பிட்டு, அதனைத் தொடர்ந்து சிவனடிமை, சென்னை என்று வெளியிட்டிருந்த விதம் என்னை நெகிழச் செய்தது.

கடந்த முறை என்னுடன் அமர்நாத் பயணித்த அன்பர்களோடு இந்த விவரங்களை பேசி ஒரு குறிப்பிட்ட தொகையை நன்கொடையாக வசூலித்து அதனை அவருக்கு மணி ஆர்டர் அனுப்பினேன். மிகவும் மகிழ்ந்து போன அவர்கள் நான் கண்டிப்பாக குன்னூருக்கு வந்தே ஆக வேண்டும் என்று அடிக்கடி போன் செய்து அழைத்தார். இன்று கூட என்னை நினைவு படுத்தினார். சிவனருளால் இன்று எனது தீசிஸ் மற்றும் ப்ராஜெக்ட்களை யூனிவர்சிட்டியில் சேர்த்து விட்டேன் (இருபது ஜூன் தான் அதற்கான கடைசி நாள்). எனது தீசிசை கடந்த சனியன்று (18.06.2011) ICF Colony சத்சங்கத்தில் நிகழ்ந்த திருமந்திர வகுப்பின் போது, சிவனுக்கு அர்ப்பணித்து பூசைகள் செய்து எடுத்துக் கொண்டேன்.

எனது தீசிசின் டெடிகேஷன் பக்கத்தில் இவ்வாறு எழுதி இருந்தேன்:

DEDICATED

TO LORD SHIVA-THE YOGISHWAR,

MAHARISHI PATHANJALI,

SAINT THIRUMOOLAR, ALL YOGINS, YOGINIS, MY PARENTS,

BELOVED FAMILY MEMBERS

TO MY YOGA ASAN

YOGI DR.T.A.KRISHNAN, THIRUMOOLAR YOGA &NATURAL DIET RESEARCH CENTRE, CHENNAI

சிவனருளால் அனைத்தும் நல்ல படியாக நடந்து வருகிறது. ஆகவே, 21.6.2011 இரவு சிவனடியார்கள் நடத்தும் சிவபூசை, மற்றும் அன்னதான நிழச்சியில் கலந்து கொள்ள குன்னூர் சென்றேன் என்பதை மிகவும் மகிழ்ச்சியுடன் குழும அன்பர்களுக்கு தெரிவித்துக் கொள்கிறேன்.

இந்த முறை பவானி இரவி குழுவினர் பத்ரிநாத், கேதார்நாத் சென்று பின்னர் அங்கிருந்து ஜம்மு சென்று வைஷ்ணோதேவி (கத்ரா) யாத்திரை மேற்கொண்டு அதன் பின்னர் அமர்நாத் குகைக்கு பயணிக்கிறார்கள்.

நான் அவர்களது குன்னூர் வைபவங்களில் கலந்து கொண்டு விட்டு பின்னர் அவர்களுடனே புறப்பட்டு சென்னை வந்து அவர்களை புனித யாத்திரைக்கு வழியனுப்ப இருக்கிறேன்.

இந்த முறை அமர்நாத் செல்ல இரண்டரை லட்சம் பக்தர்கள் பதிவு செய்திருப்பதாக சமீபத்தில் வெளியான செய்திக் குறிப்பு தெரிவிக்கிறது.

எண்ணமெல்லாம் நீக்கமற நிறைந்திருக்கும் என் சிவன் என்னை அவரது அடியார்களுடன் தொடர்பு கொள்ள வைத்திருப்பதை என்னவென்று சொல்வேன்? எல்லாம் சிவனருள் தான் என்பதில் இரு வேறு கருத்து இருக்கமுடியாது. அடுத்த ஆண்டு அவர்களது அணியில் என்னையும் இடம் பெறச் சொல்லி குன்னூர் சிவனடியார்கள் எனக்கு அன்புக் கட்டளை இட்டிருக்கிறார்கள். அதனை இறைவன் எனக்கு இட்ட ஆணையாக ஏற்றுக் கொண்டிருக்கிறேன்.

குன்னூர் சென்று வந்த அந்த நிறை இறை அனுபவங்களை உங்களுடன் படங்களுடன் காணொளிகள் எண்ணப் பதிவுகள் என்று பகிர்ந்து கொள்ளப் போகிறேன். நீண்ட நாட்களுக்குப் பின்னர் தங்களை போன்ற இறையன்பர்களுடன் அளவளாவ மீண்டும் ஒரு நல்வாய்ப்பினை ஏற்படுத்தித் தந்திருக்கும் இறையருளை பணிகிறேன்.

சிவனருள் பொலிக.

(சிவகணங்கள் தொடரும்)

--

'அன்பே சிவம்' அஷ்வின்ஜி
பிரபஞ்சத் துகளில் 'நான்' யார்?

'கர' வருஷத்துப் புத்தாண்டு நல்வாழ்த்துக்கள்.

2011-04-14T09:07:00.000+05:30

என்னை ஆதரிக்கும், எல்லா வலைப்பதிவர்களுக்கும், எனது இதயம் நிறைந்த தமிழ்ப் புத்தாண்டு வாழ்த்துக்கள்.

நீங்களும் உங்கள் சுற்றமும் நட்பும், எல்லா வளமும், நலமும் பெற்று வாழ்ந்திட, இறையருள் வேண்டுகிறேன்.

வாழி நலம் சூழ; சிவனருள் பொலிக.

அஷ்வின்ஜி

பிரபஞ்சத் துகளில் 'நான்' யார்?

பாகம் மூன்று: பகுதி பதினேழு :- வைஷ்ணோதேவி-அமர்நாத் புனித யாத்திரை அனுபவங்கள்.அமர்நாத் புனித யாத்திரை - தொடரும் நினைவலைகள்.

2011-04-08T08:46:00.002+05:30

அமர்நாத் யாத்ரா - தொடரும் நினைவலைகள்.

கடந்த ஜூலை (2010) மாதம், நானும் என் நண்பர்களும் ஜம்மு-காஷ்மீரில் உள்ள வைஷ்ணோதேவி மற்றும் அமர்நாத் புனிதத் தலங்களுக்கு பயணம் சென்று இருந்தோம். அந்தப் பயண அனுபவங்களை ஒரு தொடர் கட்டுரையாக இந்த வலைப்பூவில் நான் வெளியிட்டேன். அந்தப் பயண கட்டுரையை படிக்க விரும்புபவர்கள் இந்த இணைப்பில் சென்று படிக்கலாம்.

முதல் மற்றும் இரண்டாம் பாகங்கள்:- வைஷ்ணோதேவி-அமர்நாத் புனிதப் பயண அனுபவங்கள்.

பாகம் மூன்று: பகுதி ஒன்று -வைஷ்ணோதேவி-அமர்நாத் புனித யாத்திரை அனுபவங்கள் - கோவிந்த் மனோகர் எழுதுகிறார்.

அதே கால கட்டத்தில் சென்னையில் இருந்து வேறொரு குழுவில் அமர்நாத் சென்று வந்த அனுபவங்களை ஒரு பெண் அமர்நாத் யாத்ரி பதிவு செய்து உள்ளார். அதனை இங்கே வெளியிட்டு மகிழ்கிறேன்.

ஓம் சிவோஹம்.

அவனருள் இன்றி அணுவும் அசையாது.

இயற்கை எழில் ஏகாந்தமாய் இன்னிசை பாடும் இமயமலையில் பனிலிங்கமாய் உருவாகி பக்தர்களுக்கு அருள்பாலிக்கும் அமர்நாத் குகைக்கு சென்று ஈஸ்வரனை தரிசிக்கும் பெரும் பேறு அவ்வளவு சுலபமாய் எல்லோருக்கும் கிட்டிவிடுவதில்லை. அப்படி ஒரு பாக்கியத்தை அவனருளால் பெற்ற நான் அந்த அனுபவங்களை பகிர்ந்து கொள்ள ஆசைப்படுகிறேன்.

ஜூலை, ஆகஸ்ட் மாதங்களில் தான் இப்பயணம் கைகூடும். 2010 ஆம் ஆண்டு ஜூலை மாதம் இருபது பேர் கொண்ட குழுவுடன் அமர்நாத் பயணம் செய்யும் பாக்கியம் எனக்கு கிடைத்தது.

டெல்லி சென்று அங்கிருந்து விமானம் மூலம் ஸ்ரீநகர் சென்றோம். டால் ஏரியில் மிதந்த போட் ஹவுஸில் தங்கினோம். மிதக்கும் மார்க்கெட், பூத்துக் குலுங்கும் ரோஜாக்கள் என டால் ஏரியின் அழகு மனதை மயக்கியது.

படகில் சுற்றி வந்த போது ஏரியின் ஒரு பகுதி நம்மூர் கூவத்தை ஞாபகப்படுத்தியது. நாங்கள் சென்ற சமயம் காஷ்மீரில் ஊரடங்கு சட்டம் அமலில் இருந்தது, சாலைகள் வெறிச்சோடி கிடந்தன. அசம்பாவிதங்கள் ஏதும் கண்ணில் படவில்லை.

மறுநாள் அதிகாலை சோனாமார்க் என்ற ஊருக்கு நான்கு ஸ்கார்ப்பியோ கார்களில் கிளம்பினோம். அங்கு கிளேசியர் என்ற ஹோட்டலுக்கு சென்று குளிர் காக்கும் உடைகளை அணிந்து காலில் சாக்ஸ், பூட்ஸ் சகிதம் 15 கிலோமீட்டர் தொலைவில் இருந்த பால்தால் என்ற இடத்திற்கு சென்றோம்.

அங்கிருந்து தான் ஹெலிகாப்டர்கள் இயக்கப்படுகின்றன.

ஹெலிகாப்டர் மூலம் பஞ்சதரணி எனும் இடத்தை அடைந்தோம்.

அங்கிருந்து 5கிலோமீட்டர் தூரம் நட்தோ, டோலி அல்லது குதிரை மூலமோ தான் செல்ல வேண்டும்.

ஒத்தையடிப்பாதை, ஒருபக்கம் அதலபாதாளம். கீழே சிந்து நதி அமைதியாய் அழகாய் ஓடிக்கொண்டிருந்தது. வழி முழுவதும் பனி மூடிய இமயமலையின் இயற்கை அழகும், சிந்துநதியின் சிங்காரமும் கண் குளிர கண்டோம்.

இருபுறம் பனி உறைந்து இருக்க, நடுவே பள்ளத்தில் உருகி ஓடும் தண்ணீர்.

அமர்நாத் குகை, 3888 அடி உயரத்தில் இமயமலைழில் உள்ளது. முகலாய மன்னர் அக்பர், ஷாஜகான் காலங்களிலும் அமர்நாத் யாத்திரை சிறப்புடன் நடந்துள்ளது என்பதை ஜகன்நாத பண்டிதராஜ் என்பவர் எழுதிய நூலான அசிப் விலாசம் என்ற நூலில் தேவர்கள் தலைவர் இந்திரன் சிவபெருமானை வணங்க அமர்நாத் வருவதாக கூறப்படுகிறது.

ஸ்ரீநகரிலிருந்து பகல்காம் எனும் இடம் வரை வாகனத்தில் சென்று 46 கிலோ மீட்டர் தொலைவில் உள்ள அமர்நாத் குகைக்கு நடந்து அல்லது குதிரை, டோலி மூலம் செல்லலாம்.

இடையிடையே டென்ட்டுகளில் தங்கி 3 நாள் யாத்திரையாக செல்ல வேண்டிய வழி அது. நாங்கள் சென்றது வேறு பாதை.

150 அடி உயரமும் அகலமும் கொண்டது. அமர்நாத் குகை.

ஈஸ்வரனை காணும் படப்படப்புடன் குதிரை மூலம் பயணித்தோம். ஓரிருவர் டோலி மூலம் சென்றார்கள். குதிரைக்கு 350 ரூபாய் வாங்குகிறார்கள். கடுங்குளிரையும் பொருட்படுத்தாது சென்றோம்.

பம்பம் போலோ அமர்நாத் கீ ஜெய் எனும் பக்தர்களின் கோஷம் விண்ணைப் பிளந்தது.

குதிரைப் பயணம் கோடாஸ் ஸ்டாண்டில் முடிந்தது.

அங்கிருந்து பனிக்கட்டி மீது குச்சியை ஊன்றி நடந்து சென்றோம். சிரமமாக இருந்தது. பனியின் மீது நடக்க வழுக்கலும், சறுக்கலுமாக இருந்தது. அங்கிருந்து அரை கிலோ மீட்டர் தூரம் டோலிவாலாக்கள் 200 ரூபாய் வாடகை பேசி படிக்கட்டு வரை கொண்டு போய் விட்டார்கள். அங்கிருந்து கொஞ்ச தூரம் பனிமூடிய படிக்கட்டுகள் ஏறினோம். இவ்வளவு கடுமையான பயணத்திலும் ஈசனை தரிசிக்க தேனீக்கூட்டம் போல் பக்தர்கள் நிரம்பி வழிந்தனர்.

குகைக்கு அருகில் சென்றதும், அண்ணாந்து பார்த்தால் மலையில் ஒரு புறம் விநாயகர் உருவம், இன்னொரு இடத்தில் நந்தி உருவம் தெரிகிறது. ஒரு வழியாக குகைக்குள் சென்று கம்பி வேலிக்கு பின்னால் உருவாகியிருந்த பனி லிங்கத்தை பார்த்தபோது கண்கள் பனித்தன.

அந்த இடம் முழுவதும் பனிக்கட்டியாக உறைந்து அடைக்காமல் லிங்கமாக மட்டும் பனி உறைவது இறையின் அற்புதம் தான்.

நாங்கள் பார்த்தபோது பதினொரு அடி உயர பனிலிங்க தரிசனம் கிடைத்தது. இங்கு சில சமயம் இரண்டடி உயர லிங்கம் தான் இருக்குமாம். எங்களுடன் தெனாலி எனும் ஊரிலிருந்து வந்தவர், சென்ற வருடம் இவ்வளவு சிரமப்பட்டு வந்து தரிசனம் கிடைக்காமல் திரும்பினாராம்.

சிலசயம் உருவாகும் லிங்கம் சீக்கிரம் உருகி விடுகிறது என்றும் சொல்கிறார்கள். கேதார், பத்ரி போன்ற இடங்களுக்கு சிரமப்பட்டு சென்றாலும் தரிசனம் நிச்சயம்.

அமர்நாத் அப்படியல்ல. அவனருள் இருந்தால் தான் அவனை தரிசிக்க முடியும் என்பது நிதர்சனம். ஹெலிகாப்டர்கள் இயற்கை சூழல் சரியாக இருந்தால் மட்டுமே இயக்கப்படுகின்றன. எல்லாவிதத்திலும் ஈஸ்வரனருளால் எங்களுக்கு அவரை பிரமாண்டமான லிங்கமாக தரிசிக்கும் பாக்கியம் கிடைத்தது.

மனநிறைவுடன் திரும்பி டோலி, குதிரை மூலம் பஞ்சதரணியை அடைந்தோம். நாங்கள் மாலை அறரை மணியளவில் தான் திரும்ப முடிந்தது. 5 மணிக்கு மேல் ஹெலிகாப்டர்கள் இயங்காது. எனவே அங்கு ஒரு டென்டில் தங்கினோம். மறுநாள் காலை ஆறரை மணிக்கு ஹெலிகாப்டர் மூலம் பால்தால் வந்து பின்னர் காரில் சோனாமார்க் வந்து சேர்ந்து ஓய்வெடுத்தோம்.

எங்கள் குழுவில் டாக்டர் ஜெயக்குமார் அவர்களும், அவர் மனைவி ஆண்டாளும் பெங்களூரிவிலிருந்து வந்திருந்தார்கள். இருவரும் மூத்த குடிமக்கள்.

ஆண்டாள் அம்மாவுக்கு பல ஆபரேஷன்கள் நடந்திருந்தும் மன உறுதியுடன் வந்தார்கள். மற்றுமொரு வயதான அம்மா காலில் சாக்ஸூடன் செருப்பு அணிந்து வந்து ஜில்லிப்பு தாங்காமல் அழுதார்கள்.

எங்கள் குழு காப்டன் சுனில் அதிகாரிகளிடம் சிரமப்பட்டு அனுமதி வாங்கி அவர்களை டோலி மூலம் அழைத்து வந்து தரிசனம் செய்வித்தார்கள்.

கடுமையான பயணத்தை நினைத்து யாரும் பயப்பட வேண்டாம். எங்கும் ராணுவ வீரர்கள் காவலாகவும், உதவியாகவும் இருக்கிறார்கள். மறுநாள் ஸ்ரீநகர் திரும்பினோம். ஊரடங்கு உத்தரவு தளர்த்தப்பட்டிருந்தது. எனவே ஸ்ரீநகரில் புகழ்பெற்ற மொகல் கார்டன்களை பார்த்தோம். சாலிமார் கார்டன் மிக அழகு. பரிமகல் கார்டனில் மெடிகேட்டட் வாட்டர் வந்தது. நேருவுக்கு அந்த தண்ணீர் அனுப்பப்பட்டதாக சொன்னார்கள்.

துலீப்கார்டன் மிகப் பெரியது. துலீப் மலர்கள் ஒரு சீசனில் தான் பூக்குமாம். 250 படிக்கட்டுகள் கொண்ட சங்கராச்சாரியார் கோயில் சென்றோம். ஆதிசங்கரர் அங்கு வந்து ஒரு குகையில் அமர்ந்து தியானம் செய்ததாக சொன்னார்கள்.

மறுநாள் குல்மார்க் சென்றோம். அங்கு மிக அதிக தூரம் உயர் செல்லும் கேபிள் கார்கள் மூலம் 2 பாயிண்டுகள் சென்று பனி சூழ்ந்த மலைப்பாறை நடுவில் பனியில் அமர்ந்து சிறிது விளையாடினோம்.

இறைவனை தரிசித்த மனநிறைவோடு காஷ்மீரை காணும் பாக்கியமும் சேர்ந்தது. உற்சாகமாகவும், உன்னதமாகவும் இருந்தது. மகிழ்வுடன் நெஞ்சம் நிறைவுடன் சென்னை திரும்பினோம்.

பனி லிங்க வடிவெடுத்துபக்தர்களை உருக வைக்கும்அமர்நாத் ஈஸ்வரன்அற்புதத்தின் ஆனந்தம்மூச்சிரைக்க நடந்தும்குதிரை டோலி என குதித்தோடியும் வரும்குவலயத்து பக்தர்களின்குமுத மலர் நெஞ்சை அமுதமெனஅள்ளிப் பருகும் ஆண்டவனவன்பனிமலர் பாதம் வணங்குவோம்

-இந்திராணி அண்ணாமலை, சென்னை.

நன்றி: தினமலர் வாரமலர் : செப்டம்பர் 01,2010.

அன்புள்ளங்களுக்கு அஷ்வின்ஜீயின் வணக்கம்....

2011-03-30T20:22:00.000+05:30

அனைவருக்கும் எனதன்பான வணக்கங்கள்.

2009, மார்ச்சு மாதம் வேதாந்த வைபவம் என்னும் இந்த வலைப்பூவை துவங்கினேன். இரண்டாண்டுகளைக் கடந்து வலைப்பூ மலர்ந்து உங்களிடையே நறுமணம் வீசிக் கொண்டிருப்பது இறையருளாலும், வலைப்பதிவு அன்பர்களின் ஆதரவினாலும் தான்.

இது வரை உலகெங்கிலும் சுமார் நான்காயிரத்து ஐநூறு பேருக்கும் மேலாக வேதாந்த வைபவம் வலைப்பூவினை பார்வையிட்டு படித்திருக்கிறார்கள் என்று பிளாக்கர் புள்ளி விவரங்கள் தெரிவிக்கின்றன. என் உளமார்ந்த நன்றியை உங்களுக்கு சமர்ப்பிக்கிறேன்.

எனது அமர்நாத்-வைஷ்நோதேவி புனித யாத்திரைக் கட்டுரைகள் வெளியான போது நிறைய அன்பர்கள் தொடரினை படித்து ஆதரவினை அன்பான பின்னூட்டங்கள் மூலமாகத் தெரிவித்தார்கள்.

தொடர்ந்து எனது நண்பர் கோவிந்த் மனோஹரும் அவரது யாத்திரை அனுபவத்தை பகிர்ந்து கொண்டு வருகிறார்.

'கர' வருஷ தமிழ்ப் புத்தாண்டை நெருங்கிக் கொண்டிருக்கும் வேளையில் உங்கள் எல்லாருக்கும் எனது அட்வான்ஸ் தமிழ்ப் புத்தாண்டு வாழ்த்துக்களை தெரிவித்துக் கொண்டு எனது பணியினை தொடர இறையருளை வேண்டுகிறேன்.

தொடர்ந்து உங்கள் ஆதரவும், இறையருளும் துணை நிற்கும் என்னும் நம்பிக்கையில் வணங்கி விடை பெறுகிறேன். மீண்டும் பதிவுகளின் மூலம் சந்திப்போம்.

அன்புடன்,

அஷ்வின்ஜி.

பாகம் மூன்று: பகுதி பதினாறு:- வைஷ்ணோதேவி-அமர்நாத் புனித யாத்திரை அனுபவங்கள்.

2011-03-20T20:02:00.001+05:30

கோவிந்த் மனோஹரின் அமர்நாத் அனுபவங்கள்.

16. அமரநாதம் - நிழலாடும் நினைவுகள்.

அமர்நாத் பயண நிழற்படங்களின் தொகுப்பு.

."பம் பம் போலே" எல்லாம் இலவசம்

ஆப்ரேஷன் அமர்நாத் அதிகாலை

அதிகாலை அல்லக்கில்....
இல்லையில்லை பல்லக்கில்.

தும்பி பறக்கையிலே

தோற்கும் வெயில்

சரிவில் குதிரை இறக்கம்

தொடரும்....

நன்றி:

புகைப்படங்களுக்கும், தலைப்புக்கும்... கோவிந்த் மனோகர்.